२२ औं संस्करणको फिफा विश्वकप फुटबलमा हालसम्मकै सबैभन्दा बढी गोल भएको छ । आइतबार राति कतारको लुसेल स्टेडियममा भएको अर्जेन्टिना र फ्रान्सबीचको फाइनलमा ६ गोल भएसँगै विश्वकप २०२२ मा सर्वाधिक १७२ गोल भएको हो ।
यसपटक हरेक खेलमा औसतमा २.६९ गोल भयो । यसअघि सन् १९९८ तथा २०१४ मा भएको विश्वकपमा समान १ सय ७१ गोल भएको थियो । यसपटकको विश्वकपमा फ्रान्सले सबैभन्दा बढी १६ गोल गर्यो ।
उपाधि जितेको अर्जेन्टिनाले ७ खेलमा कुल १५ गोल गर्न सफल भयो । यस्तै, सेमिफाइनल पुगेको इंग्ल्याण्डले ५ खेलबाट १३ गोल गर्यो । पोर्चुगलले ५ खेलबाट १२ गोल तथा नेदरल्याण्डले १० गोल गर्यो ।
त्यस्तै, ३ देशले समान २ गोल, ४ वटा देशले ४ गोल गरे । ६ वटा देशले ५ गोल, दुई देशले ६, दुई देशले ८ र स्पेनले ९ गोल गरे । बेल्जियम, डेनमार्क, कतार, ट्यूनिसिया र वेल्सले एक/एक गरे ।
कतार विश्वकपमा सहभागी ३२ देशलाई ८ समूहमा विभाजन गरिएको थियो । कतार विश्वकपमा समूह ‘ए’ बाट १५, ‘बी’ बाट १६, ‘सी’ बाट १२, ‘डी’ बाट ११, ‘इ’ बाट सबैभन्दा धेरै २२, ‘एफ’ बाट ११, ‘जी’ बाट १६ र समूह ‘एच’ बाट १७ गोल भयो । यसपालि २४ मध्ये ९ खेल बराबरीमा सकिए ।
२२ औं संस्करणको विश्वकप पेनाल्टीमा फ्रान्सलाई ४–२ ले हराउँदै अर्जेन्टिनाले ३६ वर्षपछि विश्वकप जितेको हो । उसले यसअघि सन् १९७८ र १९८६ को विश्वकप उपाधि जितेको थियो ।
फ्रान्स भने तेस्रोपटक उपाधि जित्न चुक्यो । उसले सन् १९९८ र २०१८ मा विश्वकप उपाधि हात पारेको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
