विराटनगर सुपर किंग्स काठमाडौंमा जारी पहिलो संस्करणको नेपाल टी–२० लिगको दोस्रो क्वालिफायरमा प्रवेश गरेको छ । सोमबार भएको एलिमिनेटर खेलमा काठमाडौं नाइट्सलाई ९९ रनले हराउँदै विराटनगर दोस्रो क्वालिफायरमा प्रवेश गरेको हो ।
विराटनगरले अब मंगलबार फाइनल प्रवेशका लागि जनकपुर रोयल्सको सामना गर्नेछ । जनकपुर पहिलो क्वालिफायरमा लुम्बिनी अल स्टार्ससँग ६ रनले पराजित भएको थियो । नेट रन रेटको आधारमा एलिमिनेटर पुगेको काठमाडौंले भने क्वालिफायरको यात्रा गर्न सकेन ।
एलिमिनेटर खेलमा विराटनगरले दिएको १ सय ८२ रनको लक्ष्य पछ्याएको काठमाडौंले १२.४ ओभरमा सबै विकेट गुमाएर ८३ रन मात्र बनाउन सक्यो । उसका लागि अविनाश बोहराले अविजित १६, कप्तान ज्ञानेन्द्र मल्लले १५, लोकेश बमले १३ र कमल ऐरीले ११ रन बनाए । बाँकी ब्याटरले भने दोहोरो अंकमा समेत रन जोड्न सकेन ।
काठमाडौंलाई सस्तैमा समेट्ने क्रममा स्पिनर सूर्य तामाङले २.४ ओभरमा १४ रन दिएर ४ विकेट लिए । त्यस्तै, साहब आलम, केओन जोसेफले दुई/दुई र हुसेन तलतले एक विकेट लिए ।
त्यसअघि कीर्तिपुरस्थित त्रिवि मैदानमा टस जितेर ब्याटिङ रोजेको विराटनगरले निर्धारित २० ओभरमा ६ विकेट गुमाएर १ सय ८२ रन बनायो । उसका लागि कप्तान रोहितकुमार पौडेलले अर्धशतकीय पारी खेले ।
४९ बलमा ६ चौका र दुई छक्काको मद्दतमा ६१ रन बनाए । जारी लिगमा रोहितको यो चौथो अर्धशतक हो । युवा अलराउन्डर विवेककुमार यादवले आक्रामक पारी खेले । १८ बलको सामना गरेका उनले तीन छक्का र तीन चौकाको मद्दतमा अविजित ४६ रन बनाए ।
हुसेन तलतले ३८ र राज नाननले २३ रन जोडे । काठमाडौंका लागि अनिल खरेल, कमल सिंह ऐरीले दुई/दुई, गौतम केसी, अविनाश बोहरा र एक/एक विकेट लिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
