नक्कली परीक्षार्थी बनेर अर्काको नाममा सवारी चालक अनुमति पत्रको ट्रायल (प्रयोगात्मक परीक्षा) दिने र दिन लगाउने दुईजनालाई ट्राफिक प्रहरीले नियन्त्रणमा लिएको छ ।
बिहीबार सर्लाहीको बलरा नगरपालिका–६ घर भई काभ्रेपलाञ्चोकको बनेपा बस्दै आएका २१ वर्षीय सन्तोषकुमार कुशवाहा र सिरहाको मिर्चैया नगरपालिका–४ घर भई भक्तपुरको लोकन्थली बस्दै आएका २० वर्षीय रविकुमार साहलाई ट्राफिक प्रहरीले नियन्त्रणमा लिएको हो ।
काठमाडौं उपत्यका ट्राफिक प्रहरी कार्यालयबाट खटिएको ट्राफिक प्रहरी टोलीले भक्तपुरको राधेराधे ट्रायल सेन्टरबाट कुशवाहाको नाममा साहले दुईपांग्रे सवारीसाधनको ट्रायल दिइरहेको पाइएकाले दुवैजनालाई नियन्त्रणमा लिएको हो । नियन्त्रणमा आएका दुवैजनालाई प्रहरी वृत्त ठिमी भक्तपुर पठाइएको छ ।
अर्काको नाममा झुक्याएर ट्रायल दिने प्रवृत्तिलाई रोक्नको लागि विशेष कडाइ गरिएको काठमाडौं उपत्यका ट्राफिक प्रहरी कार्यालयका सहप्रवक्ता एवं प्रहरी उपरीक्षक अबिनारायण काफ्लेले बताए ।
यसका साथै अर्कै व्यक्तिले परीक्षा दिएर सवारीचालक अनुमति पत्र निकाल्दा दक्ष चालकको कमी भई दुर्घटनासमेत निम्तिने भएकाले ट्रायल सेन्टरहरूमा थप निगरानी बढाइएको उनको भनाइ छ।
फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।
