काठमाडौंमा जारी एसिसी प्रिमियर कपअन्तर्गत ओमानविरुद्ध नेपाली स्पिनर सन्दीप लामिछानेले सानदार बलिङ गरेका छन् । उनले २ ओभर बलिङ गर्दा ६ रन दिएर महत्वपूर्ण ३ विकेट लिइसकेका छन् ।
सन्दीपले टोलीलाई दोस्रो सफलता दिलाउनेक्रममा १२.३ ओभरमा अदिल शफिकलाई १३ रनमा एल्बीडब्लु धरापमा पारे । योसँगै उनी ओअिडाईमा छिटो १०० विकेट लिने बलर बने । सन्दीपले ४२ खेलमा १०० विकेट लिएका हुन् ।
याेसँगै उनले अफगानिस्तानका स्टार राशिद खानको रेकर्ड भंग गरे । उनले ४४ ओडिआईमा १ सय विकेट पूरा गरेका थिए । ओमानविरुद्ध सन्दीपले टोलीलाई तेस्रो सफलता १२ औं ओभरको अन्तिम बलमा कप्तान जीशान मक्सूदलाई शून्यमै आउट गर्दै दिलाए ।
त्यस्तै, उनले आफ्नो दोस्रो ओभरको पहिलो बलमै कश्यप प्रजापतिलाई २५ रनमा आउट गरे । नेपाललाई पहिलो सफलता दिलाउनेक्रममा स्पिनर ललितनारायण राजवंशीले ४.३ ओभरमा जतिन्दर सिंहलाई १५ रनमा बोल्ड गरे ।
त्यसअघि कीर्तिपुरस्थित त्रिवि मैदानमा टस हारेर ब्याटिङको निम्तो पाएको नेपालले निर्धारित ५० ओभरमा ८ विकेट गुमाएर ३ सय १० रन बनायो । ओडिआईमा नेपालले कुनै पनि टोलीलाई दिएको यो अहिलेसम्मकै उच्च स्कोर हो ।
यसअघि नेपालले ओडिआईमा उच्च स्कोर आइसिसी विश्वकप लिग–२ मा पपुवा न्यूगिनी (पिएनजी) विरुद्ध बनाएको थियो । अघिल्लो महिना त्रिवि मैदानमा भएको खेलमा पिएनजीविरुद्ध नेपालले २ सय ९७ रन बनाएको थियो ।
ओमानलाई कीर्तिमानी लक्ष्य दिनेक्रममा युवा अलराउन्डर कुशल मल्लले आक्रामक शतकीय पारी खेले । ६४ बलको सामना गरेका उनले १० छक्का र ९ चौकासहित १०८ रन बनाए । कुशलले ५९ बलमा शतक पूरा गरेका थिए ।
योसँगै उनी अब एकदिवसीयमा सर्वाधिक छिटो शतक बनाउने नेपाली ब्याटर बनेका छन् । एकदिवसीय अन्तर्राष्ट्रियमा कुशलको यो पहिलो शतक हो । जारी प्रतियोगिताको पहिलो खेलमा कुशलले अर्धशतकीय पारी खेलेका थिए ।
त्यस्तै, ओमानविरुद्ध अर्का अलराउन्डर सोमपाल कामीले अर्धशतकीय पारी खेले । ४८ बल खेलेका उनले ९ चौकाको मद्दतमा अविजित रन बनाए । एकदिवसीयमा सोमपालको यो उच्च स्कोर हो । ओडिआईमा उनको दोस्रो अर्धशतक हो ।
यस्तै, भीम सार्कीले ३३, आरिफ शेखले २९ र कप्तान रोहित पौडेलले २३ रन जोडे । करण केसीले १५ बलमा २ चौका र १ छक्कासहित अविजित २९ रनको योगदान दिए ।
ओमानका लागि अयान खानले दुई, जतिन्दर सिंह, अकिब इलियास, जीशान मक्सूद, कलिमुल्लाह बिलाल खान र फैज बटले एक/एक विकेट लिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।