ओखलढुंगा– कांग्रेस नेता रमेश लेखकले अहिलेको सरकार पाकेको फर्सीजस्तै भएकाले आफैँ झर्ने टिप्पणी गरेका छन् ।
नेपाल प्रेस युनियनले शनिबार ओखलढुंगामा गरेको पत्रकार सम्मेलनमा नेता लेखकले भने, ‘अपराध र भ्रष्टाचारमा डुबेको सरकार फर्सीजस्तै हो, केही गर्नै पर्दैन, आफैँ झर्छ ।’
देशैभरि डोजरको खेति चलिरहेको भन्दै पूर्वमन्त्री लेखकले विकासका नाममा भ्रष्टाचार भइरहेकाले यसमा कांग्रेसबाट निर्वाचित जनप्रतिनिधि जोगिनुपर्ने बताए ।
नेता लेखकले अहिलेको सरकार चिल देखाएर कुखुरा खाने स्याल प्रवृत्तिको भएको टिप्पणी गरे । सरकार पानीजहाज र रेलको सपनामा जनतालाई भुलाएर विकास नभई भ्रष्टाचार गर्न तल्लीन रहेको उनको आरोप छ ।
नेता लेखकले कांग्रेसले चुनावमा हार व्यहोर्नुका कारणबारे समीक्षासमेत गरे । टिकट वितरण, उम्मेदवार छनेट, दुई पार्टीको एकतालगायत कारणले पार्टीले चुनाव हारेको उनको निष्कर्ष छ ।
ओखलढुंगा महोत्सवमा सहभागी हुन आएका एक घन्टा कार्यकर्ताहरुलाई प्रशिक्षण दिएका थिए । त्यस क्रममा उनले प्राविधक कारणले पार्टी हारेकाले निराश नभइ काम गर्न आग्रह गरे। आगामी निर्वाचनमा कांग्रेस पहिलो पार्टी हुने उनको दाबी छ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
