अर्जेन्टिनाले दक्षिण अमेरिकी विश्वकप छनोटअन्तर्गतको खेलमा कोलम्बियासँग २–१ को हार बेहोरेको छ ।
छनोटमा अर्जेन्टिनाको यो दोस्रो हार हो । अर्जेन्टिनाका कप्तान खेलाडी लियोनल मेस्सीको अनुपस्थितिमा खेलेको यो खेलमा कोलम्बियाले प्रभावशाली प्रदर्शन गर्दै जित हात पार्न सफल भयो ।
कोलम्बियाले अर्जेन्टिनासँग कोपा अमेरिका फाइनलमा सामना गरेको हारको बदला समेत लियो । गएराति भएको खेलको सुरुवातमै कोलम्बियाले येरसन मोस्क्वेराको गोलको माध्यमबाट अग्रता लिन सफल भयो । तर, अर्जेन्टिनाले लामो समयसम्म पछि नपर्दै निकालेस गोन्जालजले गोल गर्दै खेललाई १–१ को बराबरीमा ल्याए ।
जेम्स रोड्रिग्वेजको पेनाल्टीले कोलम्बियालाई जीत दिलायो । खेलको ६०औँ मिनेटमा कोलम्बियालाई पेनाल्टीको अवसर प्राप्त भयो । अर्जेन्टिनी डिफेन्डर निकोलस ओटमन्डीले कोलम्बियन खेलाडी ड्यानिएल मुनोजलाई लडाएपछि भिडियो असिस्टेन्ट रेफ्रीको सहयोगमा पेनाल्टीको अवसर दिइयो ।
जेम्स रोड्रिग्वेजले यस पेनाल्टीलाई सजिलै गोलमा परिणत गर्दै कोलम्बियालाई २–१ को अग्रता दिलाए, जुन अन्ततः निर्णायक साबित भयो ।
अर्जेन्टिना शीर्ष स्थानमा यथावत
हारका बाबजुद अर्जेन्टिना दक्षिण अमेरिकी विश्वकप छनोटको लिग तालिकामा शीर्ष स्थानमै रहेको छ । अर्जेन्टिनाको १८ अंक रहेको छ भने कोलम्बिया १६ अंकका साथ दोस्रो स्थानमा उक्लिएको छ ।
मंगलबारका अन्य खेलमा इक्वेडरले पेरुलाई १–० ले पराजित गर्दा बोलिभियाले चिलीलाई २–१ ले हराउन हरायो । भेनेजुएला र उरुग्वेबीचको खेल भने गोलरहित बराबरीमा टुंगियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
