काठमाडौं– समाजवादी पार्टीका सांसद एवं पूर्वप्रधानमन्त्री बाबुराम भट्टराई संसदमा प्रतिपक्षी बेन्चमा बसेपछि सत्तारुढ नेपाल कम्युनिस्ट पार्टी (नेकपा) का सांसद विरोध खतिवडाले यसबारे प्रश्न उठाएका छन् । भट्टराईकै दल समाजवादी पार्टीका अध्यक्ष उपेन्द्र यादव अहिले उपप्रधानमन्त्री तथा स्वास्थ्यमन्त्री छन् ।
डा. भट्टराई संसदमा प्रतिपक्षी बेन्चमा बसेपछि उचित स्थान देखाइदिन खतिवडाले सभामुख कृष्णबहादुर महरासँग माग गरेका हुन् । मंगलबार संसद बैठक चलिरहेका वेला भट्टराई राष्ट्रिय जनता पार्टी (राजपा) सांसद राजेन्द्र महतोसँगै प्रतिपक्षी बेन्चमा बसेका थिए ।
सांसद खतिवडाले बाबुराम भट्टराई प्रतिपक्षमा बस्नुमा संसदले व्यवस्थापन नगरेर हो कि उहाँले एकता प्रक्रियालाई इन्कार गरेको हो रु भन्ने प्रश्न गरेका थिए ।
खतिवडाको प्रश्नको जवाफमा संसद सञ्चालन गरिरहेकी उपसभामुख शिवमाया तुम्बाहाम्फेले निर्वाचन आयोगबाट आधिकारिक पत्र प्राप्त नभएकाले भट्टराईका लागि बस्ने व्यवस्था गर्न नसकिएको बताएकी थिइन् । निर्वाचन आयोगबाट औपचारिक पत्राचार भइसकेपछि भट्टराईलाई यथास्थानमा बस्नका लागि व्यवस्था मिलाउने उनको भनाइ थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
