काठमाडौं– ललितानिवास जग्गा प्रकरणमा अख्तियार दुरुपयोग अनुसन्धान आयोगले नेकपा नेताबाहेककालाई मात्र भ्रष्टाचार मुद्दा लगाएको भन्दै त्यसको विरोधमा नेपाली कांग्रेसले आइतबार पनि संसद अवरुद्ध गरेको छ ।
कांग्रेसको सोही मुद्दामा यसअघि बिहीबार पनि संसद् अवरुद्ध गरेको थियो । आइतबार संसद् सुरु भएलगत्तै कांग्रेस सांसदहरुले बोल्ने समय माग गर्दा सभामुख अग्नि सापकोटाले समय नदिएपछि कांग्रेस सांसदले उठेर अवरोध सुरु गरेका थिए । अवरोधकै बीच नेकपा सचेतक शान्ता चौधरीले पनि बोल्न समय मागेकी थिइन्, तर सभामुख सापकोटाले उनलाई पनि समय दिएनन् ।
सभामुख सापकोटाले प्रमुख प्रतिपक्षी नेपाली कांग्रेसले उठाएको विषय संसदबाट सम्बोधन गर्न नसकिने भन्दै संसद सञ्चालनका लागि सहयोग गर्न आग्रह गरेका थिए । कांग्रेसको कुरा आफूले गम्भीरतापूर्वक सुनेको भन्दै सभामुख सापकोटाले संवैधानिक आयोगको निर्णय र अदालत प्रवेश गरिसकेको विषयमा संसद अवरुद्ध गरिरहनुको औचित्य नहुने बताए ।
जनप्रतिनिधिमूलक थलो संसद्लाई गतिशील र चलायमान बनाइराख्नुपर्ने भन्दै सापकोटाले कांग्रेसलाई आफ्नो सरोकार संसदको विशेष समयमा राख्न पनि सुझाब दिएका थिए । सभामुखको आग्रहपछि पनि कांग्रेस सांसदहरु आफ्नो सिटमा नबसी संसद अवरुद्ध गरेपछि सापकोटाले संसद बैठक माघ २८ गतेसम्मका लागि स्थगित गरे ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।