लकडाउन लगायत कारणले तीन महिनाभन्दा बढी समय बन्द सेयर बजार खुलाउन लगानीकर्ताका पाँच वटै संघ सहमत भएका छन् ।
बजार सुधार र विकासका लागि आवश्यक काम नगरी बजार खुला गरे आन्दोलन गर्ने घोषणा गरेका लगानीकर्ताले शुक्रवार बैठक बसेर सहमति पत्रमा हस्ताक्षर गरेका हुन् ।
नेपाल धितोपत्र बोर्ड र सबै लगानीकर्ता संघका प्रतिनिधिबीच छलफल गरी बजार खुलाउनका लागि आवश्यक प्रक्रिया सञ्चालन गर्ने सहमतिसमेत भएको छ ।
छलफलका क्रममा आगामी दिनमा कुनै पनि बाहनामा बजार बन्द नगर्ने प्रतिवद्धता बोर्ड र लगानीकर्ता दुवैले व्यक्त गरेका छन् ।
नेपाल स्टक एक्सचेञ्ज (नेप्से)को अनलाइन कारोबार प्रणालीमा आवश्यक सुधार गरी युजरनेम र पासवर्ड प्रदान गर्ने समेत सहमति भएको छ ।
तत्कालका लागि नेपाल क्लियरिङ हाउस लिमिटेड कनेक्ट आईपीएस सेवा वा उपयुक्त विद्युतीय माध्यम प्रयोग गर्ने गरी कारोबार सञ्चालन गर्ने समेत सहमतिमा उल्लेख छ ।
सिडिएससीले तोकेका क्लियरिङ बैंकहरुको इन्टरनेट बैंकिङ सेवा तथा सिडिएससीको मेरो सेयर सुविधा प्राप्त गरेपश्चात विद्युतीय माध्यमबाट रकम भुक्तानी गर्न र प्राप्त गर्न समस्या नरहेकाले बजार सुचारु गराउन सकिने बोर्ड र लगानीकर्ता संघको निष्कर्ष छ ।
सकेसम्म चाँडो बजार सुचारु गराउन अनुरोध गर्दै विभिन्न लगानीकर्ता संघका प्रतिनिधिले आफ्ना सदस्यहरुलाई कोरोना महामारीको समयमा घरबाटै कारोबार गर्न प्रोत्साहित गर्ने प्रतिवद्धतासमेत गरेका छन् ।
बोर्डले कमिटीको प्रतिवेदनका आधारमा बजार सञ्चालन गर्ने बताएको छ ।
धितोपत्र बोर्डले भने सञ्चालक समितिको बैठकबाट बजार सुचारु गराउने विषयमा निर्णय हुने बताएको छ ।
बजार कसरी र कहिलेदेखि सञ्चालन गर्ने भन्ने विषय भने शनिवारसम्म बोर्डले निर्णय गर्ने बताइएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।