रौतहटको इँटाभट्टामा जिउँदै मान्छेलाई जलाइएको घटनामा संलग्न रहेको आरोप लागेका एकजनालाई प्रहरीले पक्राउ गरेको छ।
प्रहरीले रौतहटको राजपुर फरहदवामा भएको बम विस्फोटका घाइतेहरुलाई इँटाभट्टामा हालेको आरोपमा बाराको सिम्रौनगढ ४ निवासी ५५ वर्षीय बद्री सहनीलाई पक्राउ गरेको हो ।
सहनीलाई विशेष सूचनाको आधारमा प्रदेश प्रहरी कार्यालय जनकपुरधाम र जिल्ला प्रहरी कार्यालय बाराको संयुक्त टोलीले भारतको मुजफ्रपुरबाट पक्राउ गरेको हो ।
फरार रहँदै आएका सहनीलाई शुक्रबार साँझ प्रहरीको विशेष टोलीले पक्राउ गरेको २ नम्बर प्रदेश प्रहरी कार्यालयका डिआईजी धिरज प्रताप सिंहले जानकारी दिए । पक्राउ परेका सहनी इँटाभट्टाका हेड मिस्त्री थिए ।
२०६४ चैत २८ को पहिलो संविधानसभा चुनावमा धाँधली गर्ने उद्देश्यले कांग्रेस नेता मोहमद अफताब आलमले तत्कालीन राजपुर फरहदवा गाविस-४ (हाल राजपुर नगरपालिका-४) का शेख इद्रिसको गोठ घरमा बम बनाउन लगाएको र त्यसक्रममा विस्फोट भएको थियो । बम विस्फोटमा परी श्री नारायण सिंहका छोरा पिन्टु भनिने त्रिलोक प्रताप सिंह समेत १५/१६ जना घाइते र २/३ जनाको मृत्यु भएको प्रहरीको भनाइ छ ।
मृतक तथा घाइतेलाई इँटाभट्टामा लगेर जलाइएको आरोप जाहेरीका आधारमा आलम पुर्पक्षका लागि थुनामा छन् । कर्तव्य ज्यान, ज्यान मार्ने उद्योग र विस्फोटक पदार्थको कसुरमा अदालतले आलमलाई पुर्पक्षका लागि कारागार चलान गरेको छ।
उनले आलमको निर्देशनमा बम विष्फोटका क्रममा मृत्यु भएका र घाइतेलाई भट्टामा जलाइएको स्वीकारेको प्रदेश प्रहरी प्रमुख धिरजप्रताप सिंहले जानकारी दिएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
