जोखिममा रहेका मुलुकका लागि कोरोना भाइरस विरुद्धको खोप आपूर्तिको व्यवस्था मिलाउन बेलायतले १ अर्ब डलर जुटाउने बताएको छ । यो रकम विश्वका विभिन्न दाताबाट संकलन गरी रकम जुटाइने बेलायत सरकारले जनाएको छ ।
अन्य दाताले ४ डलर दिए आफ्ना तर्फबाट एक पाउन्ड रकम कोषमा राख्ने पनि बेलायत सरकारले बताएको छ । कोभाक्सका लागि बेलायतले यसअघि नै ५४ करोड ८० लाख डलर अनुदान दिइसकेको छ ।
क्यानाडा, जापान र जर्मनीले मुख्य रुपमा कोभाक्स कोषमा रकम जम्मा गरिरहेका छन् । यस कोषका लागि १ अर्ब ७० करोड डलरसम्म प्रदान गर्ने योजना दाताहरुको रहेको छ ।
बेलायती विदेश मन्त्रालयका अनुसार यसै वर्षभित्र ९२ ओटा विकासशील मुलुकका लागि कोषबाट १ अर्ब थान कोभिड–१९ को खोप वितरण गरिने छ ।
बेलायती विदेशमन्त्री डोमिनिक राबले जारी गरेको विज्ञप्तिमा यो विश्वव्यापी समस्या रहेकाले सबैलाई यस अभियानमा सहभागी गराउनुको विकल्प नरहेको बताएका छन् ।
राष्ट्रसंघका महासचिव एन्टोनियो गुटेरेसले सोमवार बेलायती विदेश मन्त्री राब र प्रधानमन्त्री बोरिस जोन्सनसँग भेट्ने कार्यक्रम रहेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
