त्रिदेशीय टि–२० सिरिजमा नेपालले नेदरल्यान्डमाथि ९ विकेटको सहज जित निकाल्दै प्रतियोगिताको शानदार सुरुवात गरेको छ । नेदरल्यान्डले दिएको १३७ रनको लक्ष्य नेपालले १५ ओभरमा मात्र १ विकेट गुमाउँदै पूरा गर्यो ।
नेपाललाई सहज जित दिलाउन अन्तर्राष्ट्रिय टि–२० मा डेब्यु गरेका कुशल भुर्तेल र आसिफ शेखले उत्कृष्ट प्रदर्शन गरे । कुशलले ४५ बलमा ६२ रन बनाए । आसिफले ३८ बलमा ५४ रन बनाएर अविजित रहे । यो खेलमा नेपालले केही रेकर्ड बनाएको छ । जुन निम्न छन् :
पहिलो विकेटका लागि सर्वाधिक ठूलो साझेदारी
नेदरल्यान्डविरुद्ध कुशल भुर्तेल र आसिफ शेखले ७६ बलमा ११६ रनको साझेदारी गरे ।
यो नेपालले अन्तर्राष्ट्रिय टि–२० मा नेपालले पहिलो विकेटका लागि गरेको सबैभन्दा ठूलो साझेदारी हो ।
यसअघि सन् २०१९ साग गेम्समा भुटानविरुद्ध पारस खड्का र ज्ञानेन्द्र मल्लले पहिलो विकेटका लागि सर्वाधिक १०८ रनको साझेदारी गरेका थिए ।
कुशल डेब्युमै कम बलमा अर्धशतक प्रहार गर्ने नेपाली खेलाडी
कुशल भुर्तेल नेपालका लागि डेब्यु खेलमा कम बलमा अर्धशतक प्रहार गर्ने खेलाडी बने । उनले आठौँ ओभरको अन्तिम बलमा १ रन जोड्दै ३० बलमा आफ्नो पहिलो अन्तर्राष्ट्रिय टि–२० अर्धशतक बनाए ।
कुशलले ४६ बलको सामना गर्दै समान ५–५चौका र छक्काको मद्दतले ६२ रन बनाए ।
यसअघि कुशल मल्लले सन् २०१९ मा युएईविरुद्धको डेब्यु खेलमा ४१ बलमा अर्धशतक प्रहार गरेका थिए ।
कुशलको यो रेकर्ड आसिफ शेखले पनि तोडे । उनले ३६ बलमा अर्धशतक प्रहार गरे ।
नेदरल्यान्डविरुद्ध नेपालको सबैभन्दा ठूलो जित
टि–२० अन्तर्राष्ट्रियमा नेपालको यो जित नेदरल्यान्डविरुद्ध सबैभन्दा ठूलो जित हो । यसअघि नेदरल्यान्डविरुद्ध नेपालले निकालेको ४ विकेटको जित सबैभन्दा ठूलो थियो ।
नेपालले यसअघि दुईपटक नेदरल्यान्डलाई ४ विकेटले हराएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।