नेपाल सुपर लिग अन्तर्गत पहिलो प्ले अफमा मंगलबार काठमाडौं रेजर्स र धनगढी एफसी प्रतिस्पर्धा गर्दै छन् ।
खेल साँझ साढे पाँचबाट त्रिपुरेश्वरस्थित दशरथ रंगशालामा हुनेछ ।
काठमाडौं समूहचरणमा ४ जित समान १-१ हार र बराबरीको नतिजा सहित १३ अंक जोडेर शीर्ष स्थानमा रहँदै प्ले अफमा पुगेको हो ।
धनगढी ३ जित २ हार र १ बराबरीको नतिजा सहित १० अंक जोडेर दोस्रो स्थानमा रहँदै प्ले अफमा पुगेको हो ।
समूह चरणका शीर्ष दुई टोलीबीच हुने यो खेलको विजेताले सिधै फाइनलमा स्थान बनाउनेछ ।
काठमाडौं विकेश कुथु र धनगढी किरण चेम्जोङको कप्तानीमा मैदान उत्रिने छन् ।
प्रतियोगितामा काठमाडौंलाई एक मात्र हार चखाउने टोली हो धनगढी । ऊ फेरि पनि जित निकाल्दै फाइनल पुग्ने दाउमा हुनेछ ।
धनगढीलाई ओलावाले अफिज, विशाल राई, दर्शन गुरुङ, पुजन उपरकोटी जस्ता खेलाडीको साथ हुनेछ ।
उसलाई पछिल्ला खेलमा उच्च प्रदर्शन गरिरहेको काठमाडौंविरुद्ध जित निकाल्न त्यति सहज भने हुने छैन ।
काठमाडौं पनि समूह चरणमा बेहोरेको हारको बदला लिँदै फाइनल प्रवेश गर्ने प्रयासमा हुनेछ ।
काठमाडौंलाई मेसौके ओलोमोउ, सन्जोग राई, स्टेफेन बिनोङ समिर, तेज तामाङ जस्ता खेलाडीको साथ रहनेछ ।
काठमाडौंलाई पनि धनगढीविरुद्ध जित निकाल्न त्यति सहज भने हुने छैन ।
यो खेलमा पराजय हुने टोलीले बुधबार ललितपुर सिटी र बुटवल लुम्बिनी एफसीबीच हुने दोस्रो प्ले अफ विजेतासँग इलिमिनेटर राउन्डमा प्रतिस्पर्धा गर्नेछ ।
बिहीबार हुने इलिमिनेटर राउन्डको विजेताले शनिबार हुने फाइनलमा पहिलो प्ले अफ विजेतको सामना गर्नेछ ।
फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।
