नवनियुक्त उपप्रधान तथा अर्थमन्त्री विष्णुप्रसाद पौडेलले आफूले अब तीनवटा लक्ष्य बोकेर काम गर्ने बताएका छन्। उपप्रधानमन्त्रीमा बढुवा भएपछि अर्थमन्त्रालयमा पदबहालीका क्रममा पौडेलले कोभिड-१९ विरुद्धको खोप सबै नागरिकलाई सुनिश्चित गर्नु आफ्नो पहिलो लक्ष्य रहेको बताएका छन्।
स्वकीय सचिव याम पाण्डेका अनुसार उपप्रधानमन्त्री पौडेलले कोभिड-१९ परास्त गर्दै नेपालीको जनजीवनलाई सहज अवस्थामा फर्काउन सरकारले सबै सामर्थ्य लगाउने बताएका छन्।
'आमनागरिकलाई कोभिड-१९ विरुद्धको खोप सुनिश्चित गर्न सरकार अब केन्द्रित हुनेछ', पदबहालीका क्रममा पौडेलले भने, 'कोभिड-१९ पराजित गर्दै सहज अवस्थामा फर्कन सरकारले सबै सामर्थ्य लगाउनेछ।'
त्यस्तै उनले कोभिड-१९ ले सिर्जना गरेको प्रतिकूलतालाई हटाउँदै आर्थिक पुनरुत्थानमा पनि सरकार जोडतोडले लाग्ने बताएका छन्। 'कोभिड-१९ लाई परास्त गर्दै अर्थतन्त्र पुनरुत्थानमा लाग्ने छौँ', उनले भने, 'यससँगै पूर्व निर्धारित समयमा निर्वाचन गराउने अभिभारालाई पनि सरकारले पूरा गर्नेछ।'
दुई अस्पताललाई २ करोड ३० लाख
पदबहालीका क्रममा उपप्रधान तथा अर्थमन्त्री पौडेलले दुईवटा अस्पताललाई २ करोड ३० लाख रुपैयाँ दिने घोषणा गरेका छन्।
उनले सल्यान अस्पतालमा अक्सिजन प्लान्ट स्थापना र एचडियु जडान गर्न एक करोड ५५ लाख दिने निर्णयलाई स्वीकृत गरेका छन्। त्यस्तै सल्यान अस्पताललाई रोल्पा अस्पतालका लागि ७५ लाख रुपैयाँ दिने निर्णयमा पौडेलले सहमति जनाएका छन्।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।