धितोपत्र बोर्डले ५१ वटा सूचीकृत कम्पनीको नाम नै सार्वजनिक गरेर अनुसन्धान प्रकृयामा तानेपछि साताको अन्तिम कारोबार दिन बिहीबार पनि सेयर बजारमा त्यसको असर कायमै देखिएको छ ।

बुधबार ५२ अंकभन्दा बढीले घटेको नेप्से सूचक बिहीबार भने तीव्र उतार-चढावबीच १.३० अंकले घटेर २९६८.४२ बिन्दुमा झरेको छ । सेन्सेटिभ परिसूचक पनि ०.५८ अंकले घटेर ५४१.१२ बिन्दुमा झरेको छ ।

अघिल्लो कारोबार दिन बुधबार २९६९.६९ बिन्दुमा बन्द भएको बजार बिहीबार २९८२.९७ बिन्दुदेखि खुला भएको हो । कारोबारको आधा घण्टाको अवधिसम्ममा २९४५.५९ बिन्दुसम्म झरेको बजारले २ घण्टा ३३ मिनेटको कारोबार अवधिमा २९९० बिन्दु कायम गरेको थियो । तर अन्त्यमा बजार अझै घटेर बन्द भएको छ । 

नेपाल धितोपत्र बोर्डले सूचीकृत विभिन्न ५१ ओटा कम्पनीमा गरिरहेको अध्ययन तथा अनुसन्धानले बजारमा कस्तो प्रभाव पर्ला भन्नेमा अन्योल बनेका लगानीकर्ताहरू बिहीबार पर्ख र हेरको अवस्थामा रहेको पाइएको छ ।

देशको जनजीवन कोरोना महामारीका कारण गत वर्षदेखि नै प्रभावित भइरहेको अवस्थामा सेयर बजारबाट आम्दानी गरेर धेरैजसो नेपालीले दैनिकी चलाइरहेको पाइन्छ । कोरोना महामारीका कारण अस्तव्यस्त अन्य व्यावसायिक क्षेत्रका व्यवसायी पनि सेयर बजारमै वैकल्पिक लगानीका रूपमा भित्रिएको जानकारीसमेत ब्रोकरहरूले दिएका छन् । 

सामान्य हल्लाबाट पनि प्रभावित बन्ने नेपालको सेयर बजार नियामककै सूचीकृत कम्पनीको सेयर कारोबारमा चलखेल भएको धारणाप्रति भने निकै प्रभावित बनेको ब्रोकरहरूको अनुमान छ । नियामकले बजार र लगानीकर्ताकै हितका लागि चालेको यो कदमले क्षणिक अन्योल भए पनि आगामी दिनमा सकारात्मक प्रभाव पर्ने र कारोबारमा हुनसक्ने चलखेललाई कम गर्ने विश्वास पनि ब्रोकरहरूले गरेका छन् ।

उनीहरूले पछिल्लो दुई दिन जानकार लगानीकर्ताले ढुक्क भएर लगानी गरेको र नयाँ लगानीकर्तामा अन्योल देखिएकाले पर्ख र हेरको अवस्थामा रहेको जानकारी पनि दिएका छन् ।

बिहीबार कारोबार रकम पनि अघिल्लो दिनभन्दा कम भएको छ । बुधबार २१९ वटा कम्पनीको २ करोड ८२ लाख ८९ हजार १२८ कित्ता सेयर १५ अर्ब ४८ करोड ४४ लाख ७९ हजार ३१९ रुपैयाँमा खरिद-बिक्री भएको बजारमा बिहीबार भने २२३ कम्पनीको २ करोड ३ लाख ६५ हजार ६९९ कित्ता सेयर कुल १० अर्ब ९० करोड ४९ लाख ५८ हजार ९३५ रुपैयाँमा खरिद-बिक्री भएको छ । 

यस दिन ६ उपसमूहको परिसूचक बढेको छ भने ७ उपसमूहको परिसूचक घटेको छ । यस दिन विकास बैंक उपसमूहको परिसूचक सर्वाधिक २.०४ प्रतिशत बढेको छ । त्यसैगरी वित्त उपसमूहको परिसूचक यस दिन १.४२ प्रतिशत बढेको छ भने अन्य उपसमूहको परिसूचक १.१७ प्रतिशत बढेको छ । त्यसै गरी, यस दिन लघुवित्त उपसमूहको परिसूचक सर्वाधिक १.१९ प्रतिशत घटेको छ ।