कर्णाली प्रदेशको राजधानी वीरेन्द्रनगरमा बत्ती अनियन्त्रित हुने समस्या नयाँ होइन । अत्यधिक मात्रामा विद्युतको खपत हुने गर्मी सिजनमा हाल वीरेन्द्रनगरमा विद्युत छिनछिनमा जाने गरेको छ । बत्ती आउने जाने गर्दा राजधानीबासी हैरानी खेपिरहेका छन् ।
बुधबार सुर्खेत जिल्लामा भइरहेको छिनछिनमा बत्ती आउने जाने क्रम रोक्न सुर्खेत उद्योग बाणिज्य संघले नेपाल विद्युत प्राधिकरण कर्णाली प्रादेशिक कार्यालयको ध्यानाकर्षण गराएको छ ।
पटके लोडसेडिङले व्यवसायीका उद्योग कलकारखानाहरु मारमा परेको भन्दै ध्यानाकर्षण गराइएको सुर्खेत उद्योग वाणिज्य संघका अध्यक्ष धन बहादुर रावतले बताए । ‘अहिले हामीले प्रसारण सुधार गर्नका लागि २ दिनको समय दिएका छौँ । यो २ दिनमा सुधार भएन भने हामी आन्दोलन गर्नेछौँ’, उनले भने ।
त्यस्तै, संघका महासचिव लक्ष्मण कँडेलले नेपाल विधुत प्राधिकरणका डिएमडी हरराज न्यौपानेसँग सुर्खेतमा विद्युत प्रसारणका समस्याका बारेमा कुरा राखेको बताएका छन् ।
डिएमडी न्यौपानेले सुर्खेतबाट पहिलो पटक यसरी कुरा आएको बताउँदै सुर्खेतको विद्युत प्रसारणमा रहेका समस्याहरुलाई आफ्नो तर्फबाट समाधानका लागि पूर्णरुपमा लागि पर्ने बताए ।
कोरोना भाइरसको कारण गएको वैशाख देखि बन्द रहेका उद्योगहरु पछिल्लो समय सञ्चालन हुन थाले पनि विद्युतका कारण मारमा परेका छन् । अत्यधिक गर्मी हुन सुर्खेतमा विद्युत नियमित नहुँदा स्थानीय पनि समस्यामा छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।