पाठ्यक्रम प्रारुप अनुसार विद्यालयस्तरमा मातृभाषा पठनपाठन गराउनुपर्ने माग गर्दै मैथिली साहित्यकार सभाले शिक्षा विकास तथा समन्वय एकाइ धनुषामा ज्ञापनपत्र बुझाएको छ ।
विद्यालय शिक्षाको राष्ट्रिय पाठ्यक्रम प्रारुप, ०७६ को परिच्छेद ४ को ४.५ मा उल्लेखित व्यवस्था अनुसार आधारभूत तहमा मातृभाषा/स्थानीय विषय (मैथिलीभाषी क्षेत्रमा मैथिली विषय) पठनपाठनका लागि सम्पूर्ण पालिका तथा विद्यालयहरूलाई परिपत्र पठाउन मैथिली साहित्यकार सभाले माग गरेको हो ।
यस शैक्षिक सत्रमा पाठ्यक्रम प्रारूप विपरीत अन्य विषय पठन-पाठन गराउने पालिका तथा विद्यालय विरुद्ध कडा संघर्ष गर्दै अदालती कारबाही गरिने ज्ञापनपत्रमार्फत चेतावनी समेत दिइएको छ ।
मैथिली साहित्यकार सभाका तर्फबाट शिक्षा विकास तथा समन्वय एकाइ धनुषाका प्रमुख ईश्वरीप्रसाद ज्ञवालीलाई सभाका सभापाल प्रेम विदेह ललनको नेतृत्वमा पुगेको तीन सदस्यीय प्रतिनिधिमण्डलद्वारा ज्ञापनपत्र बुझाइएको छ ।
ज्ञापनपत्र बुझाउन मैथिली साहित्यकार सभाका सह-सभापाल पुनम झा मैथिली र कार्यपाल अरविन्द कुमार यादव समेत पुगेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।