जापान सरकारले नेपाललाई कोरोना भाइरसविरुद्धको खोप दिने घोषणा गरेको छ । जापानका विदेशमन्त्री तोसिमित्सु मोटेगीले अस्ट्राजेनिकाको खोप दिने घोषणा गरेका हुन् ।
जापानले नेपालसहित बंगलादेश, कम्बोडिया, इरान, लाओस, श्रीलंका र अन्य प्यासिफिक आइसल्याण्ड राज्यलाई १ करोड १० लाख डोज खोप कोभ्याक्स सुविधामार्फत दिने घोषणा गरेको हो ।
जापानले जुलाई भित्रमा उक्त खोप सम्बन्धित देश पठाइसक्ने योजना रहेको मन्त्री मोटेगीले जानकारी दिएको जापान टाइम्सले उल्लेख गरेको छ ।
जापानले इण्डोनेसिया, ताइवान र भियतनामलाई १०/१० लाख डोज खोप पठाउँदैछ । उक्त खोप बिहीबारसम्म सम्बन्धित देशमा पठाइने बताइएको छ । जापानले सबै देशहरूलाई कोभ्याक्स सुविधामार्फत नै खोप उपलब्ध गराउन लागेको हो ।
यसअघि अमेरिकाले पनि नेपाललाई कोभ्याक्स सुविधामार्फत १५ लाख ३४ हजार भन्दा बढी डोज खोप उपलब्ध गराएको थियो । अहिलेसम्म नेपालमा अनुदानमा र नेपालले खरिद गरेर ६५ लाख ४८ हजार भन्दा बढी डोज खोप पाइसकेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
