आफू नेकपा माओवादी केन्द्रकै सांसद रहेको भन्दै सर्वोच्च अदालतमा पार्टीको निर्णयविरुद्ध रिट दिएका नेता लेखराज भट्ट नेकपा एमालेको स्थायी समिति बैठकमा सहभागी भएका छन् ।
नेकपा एमाले र नेकपा माओवादी केन्द्रबीच एकीकरण भएर बनेको नेकपालाई सर्वोच्च अदालतले फुटाइदिएपछि एमालेमै रहने निर्णय गरेका तत्कालीन माओवादी नेता लेखराज भट्ट अहिले आफू माओवादीकै सांसद रहेको दाबी गरिरहेका छन् ।
साउन १३ गते आफूहरु माओवादीमै रहेको दाबी गर्दै सांसद पद पुनःस्थापनाको मागसहित रिट लिएर सर्वोच्च पुगेका भट्ट आज एमालेको स्थायी समिति बैठकमा उपस्थित भएका हुन् । तर, उनीसँगै रिट हालेका पूर्वमाओवादी तथा अहिलेका एमाले नेता टोप बहादुर रायमाझी भने बैठकमा गएका छैनन् ।
आजको एमाले बैठकमा पूर्वमाओवादी नेताहरु राम बहादुर थापा बादल र भट्ट सहभागी छन् । बादलले आफू माओवादी भएको दाबी गरेका छैनन् । तर, भट्ट आफू माओवादी भएको दाबी गर्दागर्दै एमाले बैठकमा सहभागी भएका हुन् ।
नेकपाको एकीकरण बदर भएसँगै माअोवादी छाडेर एमाले बनेका नेताहरु भट्ट, रायमाझी, प्रभु साह र गौरीशंकर चौधरीले आफूहरुले पार्टी त्याग नगरेकाले सांसद पद बहाली हुनुपर्ने भन्दै सर्वोच्चमा साउन १३ गते रिट दायर गरेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।