सत्तारुढ नेकपा माओवादी केन्द्रका सांसद मातृका यादवले प्रमुख प्रतिपक्षी दल नेकपा एमालेका अध्यक्ष केपी शर्मा ओलीविरुद्ध संसदमा गरेको टिप्पणी रेकर्डबाट हटाउन सभामुख अग्निप्रसाद सापकोटाले रुलिङ गरेका छन् ।
प्रतिनिधिसभाको आजको बैठकमा सभामुख सापकोटाले एमाले अध्यक्ष ओलीको स्वास्थ्यका विषयमा सांसद यादवले गरेको टिप्पणी संसदको रेकर्डबाट हटाउनका लागि रुलिङ गरेका हुन् ।
एमालेले आजको बैठक सुरु भएलगत्तै यादवको अभिव्यक्ति हटाउन माग गर्दै आपत्ति जनाएपछि सभामुखले रुलिङ गरेका हुन् । यादवले बोलेका शब्द संसदीय मर्यादा र नियमावलीविपरीत रहेको भन्दै संसदको रेकर्डबाट हटाउन सभामुख सापकोटाले सचिवालयलाई निर्देशन दिएका हुन् ।
बिहीबारको संसद बैठकमा ओलीकै क्याबिनेटमा मन्त्री रहेका यादवले ओलीको मानसिक स्वास्थ्यको विषयमा प्रश्न उठाउँदै टिप्पणी गरेका थिए । उनले ओली मानसिक रुपमा अस्वस्थ रहेको भन्दै राजीनामा दिएर सदनमा नआउन भनेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
