वाट्मोरपछि कसको हातमा जाला नेपाली क्रिकेटको जिम्मेवारी ?
फरकधार / १४ भदौ, २०७८

नेपाली राष्ट्रिय क्रिकेट टोलीका प्रमुख प्रशिक्षक डेभ वाट्मोरले नेपाली राष्ट्रिय टोलीको प्रशिक्षकको जिम्मेवारी सम्हालेको आठ महिनामै राजीनामा दिएका छन्। 



उनलाई आइसिसीको सहमतिअनुरूप नेपाल क्रिकेट एसोसियसन (क्यान)ले जनवरी १ देखि जिम्मेवारी दिएको थियो । उनले शुक्रबार इमेल लेख्दै क्यानमा राजीनामा दिएका हुन् ।

महामारीको समयमा परिवारसँग छुट्टिएर बस्नुपरेको कारण देखाई राजीनामा दिएको उनले बताएका छन् ।

उनको आगमनअघि अन्तर्राष्ट्रिय क्रिकेट काउन्सिल आइसिसीबाट एकदिवसीय अन्तर्राष्ट्रिय मान्यता प्राप्त नेपालमा गत फ्रेबुअरीदेखि मुख्य प्रशिक्षक कोही थिएन।



क्यानले सन् २०२० सेप्टेम्बरमा मुख्य प्रशिक्षकको लागि दरखास्त आह्वान गरेको थियो । नेपालको मुख्य प्रशिक्षक बन्नका लागि ७२ जनाले आवेदन दिएका थिए । क्यानले अन्तिम चरणमा अन्तर्वार्ताका लागि १५ जना छनोट गरेको थियो । तर, अन्तर्वार्तामा १२ जनामात्र उपस्थित थिए ।

वाट्मोरको राजीनामापछि अब को प्रशिक्षक भन्ने प्रश्नमा क्यानका सचिव अशोकनाथ प्याकुरेलले आवेदन दिएका पहिलाकै प्रशिक्षकहरूलाई प्राथमिकतामा राखिने बताएका छन् । ‘निकै दृढ विश्वासका साथ उहाँले राजीनामा दिनुभएको छ । जहाँसम्म लाग्छ, उहाँ फर्किने सम्भावना न्यून छ,’ सचिव प्याकुरेल भन्छन्, ‘परिवारसँग बस्ने उहाँको इच्छा हो । उहाँको परिवार नेपाल ल्याएर बस्ने कुरामा पनि मान्नुहुन्छ जस्तो लागेन ।’

क्यानले वाट्मोरलाई नियुक्त गर्ने क्रममा अन्तिममा चार जनालाई छनोट गरेको थियो । त्यसमध्ये वाटमोर रोजाइमा परेका थिए । नेपालका पूर्वप्रशिक्षक पुबुदु दासानायके, अपूर्व सुबोधभाइ देसाई, नेइल क्याक्रेईलगायतले अन्तर्वार्ता दिएका थिए ।

प्याकुरेलले अब देसाइ, क्याक्रेइ र पुबुदुलाई पुनः सम्पर्क गर्ने बताएका छन् । ती तीनजना नेपाल आउन नमानेमा अन्य प्रशिक्षक खोज्ने उनको भनाइ छ । ‘तीनजना प्रशिक्षकलाई हामीले विकल्पका रूपमा राखेका थियौं । अब तिनै तीनजनामध्ये एकलाई ल्याउने प्रयास गर्ने छौं । त्रिदेशीय शृंखला सकिनेबित्तिकै मुख्य प्रशिक्षक नियुक्तिको प्रक्रिया थाल्नेछौं,’ उनले भने ।

कोभिड संक्रमण मत्थर हुँदै गर्दा विस्तारै क्रिकेटका अन्य प्रतियोगिताहरू पनि सञ्चालन हुने छन् । यही क्रममा प्रमुख प्रशिक्षकको अप्रत्याशित राजीनामाले नेपाली क्रिकेटमा हलचल ल्यायो ।

कार्यकाल छोटो समय हुँदा पनि नेपाली क्रिकेटमा निकै सुधार ल्याएका वाट्मोरले पारिवारिक कारण देखाए पनि राजीनामाको अन्य कारणको चर्चासमेत सामाजिक सञ्जालमा हुन थालेका छन् । 

उनले राजीनामा दिनुमा उनको परिवारसँग बस्ने चाहनाका साथै उनको बढ्दो उमेर पनि हुन सक्ने अनुमान गरिएको छ । उनी ६७ वर्षका भइसकेका छन् । उनी खेलाडी र प्रशिक्षणकै क्रममा चार दशकभन्दा बढी समय घर-परिवारबाट टाढा बसिसकेका छन् ।

राजीनामाको अर्को कारण भनेको कोभिडका कारण धेरै खेलहरू स्थगित हुनु पनि रहेको छ । उनले आफ्नो काम राम्रोसँग गर्न पाएनन् । यो कारण पनि उनमा ‘फ्रस्टेसन’ आएको हुन सक्ने बताइन्छ । नेपालको प्रशिक्षकका रूपमा कार्यरत रहँदा नै उनले बर्मुडासँग सम्झौता गरेको चर्चासमेत भएको थियो । उनको राजीनामासँग बर्मुडाले दिएको राम्रो पारिश्रमिक पनि कारणका रूपमा जोडिएर आउन थालेको छ ।  

वाट्मोरले देखाएको आशा 

नेपालमा अहिलेसम्म थुप्रै प्रशिक्षक आइसकेका छन् । डेभ वाट्मोर नेपालले पाएको एक उत्कृष्ट प्रशिक्षक थिए । उनले नेपाली क्रिकेटमा नयाँ आशा जगाएका थिए । नयाँ खेलाडीको पहिचान गर्दै तिनलाई मौका दिनुलाई उनको सकारात्मक पाटो मानिन्छ । नेपाली क्रिकेटको खेल शैलीमै उनले परिवर्तन ल्याए।

वाट्माेरकाे प्रशिक्षणमा नेपालले घरेलु मैदानमा भएको मलेसिया र नेदरल्यान्ड्सविरुद्धको टी-ट्वान्टी क्रिकेट सिरिजको उपाधि जितेको थियो । उनले नेपाली क्रिकेटमा जगाएको यो आशाको धरोहर एकाएक कमजोर प्रतीत भएको छ । 

उनले सट छनोट, डट बलमा कमी, आक्रामक ब्याटिङ, कमजोर ब्याटिङ सुधार, टिम सन्तुलन र उच्च मनोबल जगाएर नेपाली क्रिकेटमा नयाँ आशाको दियो बालेका थिए । अर्कोतर्फ भद्रगोल ब्याटिङक्रम समस्या पनि सुधार आएको थियो । नेपाली क्रिकेटमा पछिल्लो समय सर्वाधिक कमजोर देखिएको अस्थिर ओपनिङ जोडी उनले पहिलो प्रयासमा नै सुधार्ने संकेत देखाएका थिए । 

उनले नेपाली क्रिकेट समर्थकको माया र विश्वास राम्रै बटुले । घरेलु मैदानमा नयाँ ओपनरका रूपमा डेब्यु गरेका कुशल भूर्तेलले तीन अर्धशतक बनाएका थिए । वाट्मोरको खेलाडी पहिचान गर्ने क्षमताका कारण पनि नेपाली क्रिकेटले नयाँ गति लिने आशा जागेको थियो ।

गत बैशाखमा भएको त्रिकोणात्मक सिरिजमा वाट्मोरले नेपाली खेलाडीको कमजोरी पत्ता लगाए, तिनमा रहेको सम्भावना चिने र खेलाडी तथा समर्थकको मायाको अवसर प्राप्त गरे । ओमन भ्रमणलाई उनको वास्तविक परीक्षाको रूपमा हेरिएको थियो । विदेशमा उनको प्रशिक्षकत्वमा नेपालको प्रदर्शन कस्तो हुन्छ भन्ने धेरैका लागि चाखको विषय थियो । तर, वाट्मोरले ओमन भ्रमणलगत्तै लागू हुनेगरी राजीनामा दिए । 

परम्परागत ब्याटिङ समस्या रहेको नेपाललाई दिशा देखाउन थालेका थिए, वाट्मोरले । हरेक प्रतियोगितामा हारको मुख्य कारण मानिन्थ्यो, नेपालको फितलो ब्याटिङ । उनले त्यो समस्या सुधार्ने कोसिस गरेका थिए । त्रिकोणात्मक सिरिजमा त्यो सुधारेको एक झलक उनले दिएका पनि हुन् । नेपालले आफ्नो ब्याटिङ सुधाएिको साबित गर्दै इतिहासकै एक उत्कृष्ट र यादगार ब्याटिङ गर्‍याे । दोस्रो खेलमा नेदरल्यान्ड्सविरुद्ध २०६ रन बनाए पनि पराजित हुन पुगेको थियो । 

ओमन भ्रमणमा नेपालको आशा उच्च थियो । वाट्मोरको राजीनामाले खेलाडीको मनोबलमा असर पर्ने चिन्ता थपिएको छ । छोटो समयमा नै नेपाली क्रिकेटमा राम्रो नतिजा पस्किएर हालसम्म आएकामध्ये सफल प्रशिक्षकको रूपमा उनी चिनिन्छन् । 

  • प्रकाशित मिति : भदौ १४, २०७८ साेमबार १४:५१:१२,   अन्तिम अपडेट : भदौ १४, २०७८ साेमबार १५:०:६

फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया