बारामा रहेको जगदम्बा स्टिल्स प्रा.लि.मा ११ भदौमा उद्योग परिसरभित्र रहेको एमोनिया ग्याँस प्लान्टको पाईपलाइनबाट ग्यास चुहावट भई उद्योग परिसर बाहिर ग्यास फैलिएपश्चात भएको निष्कर्ष सरकारी अध्ययन टोलीले निकालेको छ ।
२१ भदौमा गृहमन्त्री बालकृष्ण खाणले मन्त्रीस्तरीय निर्णयबाट गठन गरेको मन्त्रालयका सहसचिव टेकराज निरौला संयोजकत्वको नौ सदस्यीय छानबिन समितिले उद्योग परिसर बाहिर ग्यास फैलिएपश्चात स्थानीय बासिन्दा आक्रोसित भइ उद्योगभित्र प्रवेश गरी तोडफोड गरेको देखिएको प्रतिवेदनमा उल्लेख छ।
समितिले आज प्रतिवेदन मन्त्री खाणलाई बुझाएको छ ।
‘घटनामा उद्योग परिसर भित्र रहेको एमोनिया ग्यास प्लान्टको पाईपलाईनबाट ग्यास चुहावट भई उद्योग परिसर बाहिर ग्यास फैलिएपश्चात स्थानीय बासिन्दाहरु आक्रोसित भई उद्योगभित्र प्रवेश गरी तोडफोड गरेको देखिन्छ’, प्रतिवेदनबारे गृहमन्त्रालयका प्रवक्ता फणिन्द्रमणि पोखरेलले जारी गरेको विज्ञप्तिमा भनिएको छ।
विज्ञप्तिमा प्रवक्ता पोखरेलले ग्यास चुहावटको सूचना प्राप्त गरे पश्चात इलाका प्रहरी कार्यालय सिमराबाट खटिएका प्रहरी टोलीले तोडफोड नियन्त्रणको प्रयास गर्दागर्दै पनि उद्योगमा स्थानीय भीडले तोडफोड गरेको बताएका छन्।
छानबिन समितिले सरकारका तर्फबाट तोडफोडमा संलग्नको पहिचान गरी कानून बमोजिम कारवाही गर्न र औद्योगिक सुरक्षाको व्यवस्था प्रभावकारी बनाउन सुझाव दिएको छ ।
समितिले उद्योगका तर्फबाट उद्योग संचालन गर्दा औद्योगिक सुरक्षा मापदण्डको पालना गर्न, उद्योगबाट सिर्जना हुने प्रदूषण नियन्त्रण गर्न र उद्योगमा कामदार तथा कर्मचारी भर्ना गर्दा योग्यता पुगेका स्थानीयहरुलाई प्राथमिकता दिनु उपयुक्त हुने सुझाव पनि प्रतिवेदनमा दिएको छ ।
प्रतिवेदन बुझ्दै गृहमन्त्री खाणले प्राप्त सुझावहरु सम्बन्धित निकायहरुसँग समन्वय गरी कार्यान्वयन गर्न मन्त्रालयको तर्फबाट पहल गरिने बताए।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।