सुदूरपश्चिम प्रदेशमा आर्थिक मामिला तथा योजना मन्त्रीमा तारालामा तामाङ र राज्यमन्त्रीमा माया तामाङ बोहरा नियुक्त भएका छन् ।
नेकपा (एकीकृत समाजवादी) का तर्फबाट मुख्यमन्त्री त्रिलोचन भट्टले तामाङ र बोहरालाई नियुक्त गरेका हुन्।
नवनियुक्त मन्त्रीद्वयलाई शुक्रबार साँझ प्रदेश प्रमुखको कार्यलयमा शपथसमेत खुवाएको छ । प्रदेश प्रमुख गंगाप्रसाद यादवले आर्थिक मामिला तथा योजना मन्त्री तामाङलाई शपथ खुवाएका हुन् भने मुख्यमन्त्री भट्टले आर्थिक मामिला तथा योजना राज्यमन्त्री बोहरालाई सपथ खुवाएका छन् ।
भदौ २२ गते अर्थमन्त्री प्रकाशबहादुर शाह र अर्थ राज्यमन्त्री अर्चना गहतराजले पदबाट राजीनामा दिएपछि पद रिक्त थियो ।
तामाङ एमालेका पूर्वप्रमुख सचेतक हुन् भने माया तामाङ बोहरा यसअघि नेकपा विवाद हुँदा ओली पक्षमा थिइन् ।
तर तामाङले २१ भदौमा एकीकृत समाजवादीको पक्षमा सनाखत गरेपछि उनलाई राज्यमन्त्रीमा नियुक्त गरिएको हो । माओवादी नेतृत्वको सरकारमा एकीकृत समाजवादी पनि सहभागी छ ।
सुदूूरपश्चिममा एमाले विभाजनपछि एकीकृत समाजवादी १४ सांसदसहित सबैभन्दा ठूलो दल बनेको छ । एकीकृत समाजवादीका तर्फबाट आन्तरिक मामिला तथा कानुन मन्त्री पूर्णा जोशी, भौतिक पूर्वाधार विकास मन्त्री दीर्घबहादुर सोडारी, सामाजिक विकास मन्त्री लालबहादुर खड्का र दुई जना राज्यमन्त्री यसअघि नै प्रदेश सरकारमा छन् ।
प्रदेश सभामा एकीकृत समाजवादीका १४, माओवादी केन्द्रका १३, नेपाली काँग्रेसका १२, सभामुखसहित एमालेका ११, जसपा र लोसपाका एक/एक सांसद छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।