हरेक वर्षझैँ यस वर्ष पनि हाम्रो आँगनीमा दसैँ–तिहार पर्व आउनै लागेको छ । वर्षभरि यत्रतत्र छरिएर बसेका परिवारका सदस्य एकै ठाउँमा जम्मा भएर यो पर्व मनाउने रहर सबैलाई हुन्छ ।
तर, सबैले यो रहर कहाँ पूरा गर्न पाउँछन् र ? देशको आर्थिक अवनति र पारिवारिक दायित्वका कारण लाखौँ नेपाली युवा देश छाडेर परदेसिन बाध्य छन् । दसैँ–तिहारजस्ता चाडपर्वमा आफ्नै मातृभूमिमा आउने रहर कसलाई नहोला र ?
तर, साहुको ऋण सम्झिएपछि स्वदेश आउनै लागेका पाइला पनि उतै रोकिन बाध्य छन् । अझ कोरानाका कारण कतिको काम ठप्प भएको छ त कतिको भनेजस्तो कमाइ भएको छैन ।
यस्तै भावलाई गीतमा समेटेर बजारमा आएका छन् लोकसर्जक सन्तोष सुवेदी । भागिरथ चलाउने र आशा बिसीको स्वरमा नयाँ दसैँ गीत ‘साउदी कतार’ बजारमा आएको हो । काठमाडौं डिजिटल स्टुडियोमार्फत बजारमा आएको गीतको लय पनि गीतकार सुवेदी स्वयंको छ । संगीत संयोजन माधव भण्डारीले गरेका छन् ।
बबिता सुनार र कुशल पटेलकाे अभिनय रहेकाे गीतको म्युजिक भिडियो निर्देशन सफल फिल्म्सका पुंके सुरजले गरेका हुन् । निर्देशक स्वयंको छायांकन रहेको म्युजिक भिडियोको सम्पादन सुनिल विकले गरेका हुन् । पारिवारिक दायित्वका कारण परदेशिन बाध्य नेपाली दाजुभाइको यथार्थ कहानीलाई समेटेर गीतमा मर्मश्पर्शी ढंगले प्रस्तुत गरिएको छ ।
धेरै नेपालीले विदेशमा पाएको दुःखलाई आफूले गीतमार्फत सन्देश दिन खोजेको सर्जक सुवेदीले बताए । आफ्नो गीतलाई आमनेपाली दर्शक–श्रोताले मन पराउनेमा आफू विश्वस्त रहेको उनको भनाइ छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।