प्रदेश २ लोकसेवा आयोगले प्रदेश प्रमुख हरिशंकर मिश्रलाई दोस्रो वार्षिक प्रतिवेदन बुझाएको छ । सोमबार आयोगका अध्यक्ष सुरेन्द्र प्रसाद यादवले प्रदेश प्रमुख मिश्रसमक्ष वार्षिक प्रतिवेदन पेस गरेका हुन् ।
आयोगले गत वर्ष बढुवा, अन्तर सेवा तथा खुला र समावेशी गरी कुल १ सय ६५ विज्ञापनबाट २ सय ७२ पदका लागि विज्ञापन प्रकाशित गरेको थियो । जसमा बढुवातर्फ १ सय १३, अन्तरसेवातर्फ १४, खुलातर्फ ९५ र समावेशी समूहतर्फ ५० पदका लागि विज्ञापन गरेको आयोगको प्रतिवेदनमा उल्लेख छ ।
आयोगले कर्मचारीको अभाव भए पनि गत वर्ष विभिन्न सेवा र तहका लागि ८५ वटा पाठ्यक्रम निर्माण गरेको आयोगका अध्यक्ष यादवले बताए । उनले आयोगमा प्रदेश सरकारबाट २१ जनाको अस्थायी दरबन्दी रहेकोमा हाल काजमा ६ जना र करारका ५ जना कर्मचारीले मात्र कार्यसम्पादन गरिरहेको बताए ।
यस अवधिमा ८५ वटा पाठ्यक्रमको निर्माण गरिएको उनले जानकारी दिए ।
आयोगले गत वर्षको फागुन २२ र २९ गते सञ्चालन गरेको अधिकृत सातौँ तह इन्जिनियरिङ सेवाको परीक्षाका लागि २ हजार ३४८ जनाले फारम भरेकोमा १ हजार ९६ जना परीक्षार्थी सहभागी भएको प्रतिवेदनमा उल्लेख छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
