एक समय अमेरिकी राष्ट्रपति जो बाइडेनको ज्यान बचाउने अफगानिस्तानका दोभाषे अमन खलीलीले आफ्नो परिवारसहित अफगानिस्तान छोडेको छन् ।
कुरा सन् २००८ को हो । हिउँ आँधी आएपछि अमेरिकी सेनाको हेलिकप्टरले आपत्कालिन अवतरण गर्न परेको थियो । उक्त हेलिकप्टरमा जो बाइडेन पनि थिए, जतिबेला उनी अमेरिकी सांसद थिए ।
जुन स्थानमा हेलिकप्टर अवतरण गरिएको थियो त्यो सुरक्षाको हिसाबले निकै संवेदनशिल रहेको थियो । उक्त स्थानमा जुनसुकै बेला अलकायदा र तालिबान लडाकुले आक्रमण गर्नसक्थे ।
त्यतिबेला केही अफगानी स्टाफले जो बाइडेन समेत अन्य अमेरिकी सांसदलाई सुरक्षित रुपमा फर्कन मद्दत गरेका थिए । यसमा प्रमुख थिए अमन खलीली ।
अगष्टमा तालिबानले अफगानिस्तान कब्जा गरेपछि खलीलीले आफूलाई सुरक्षित स्थानमा लैजान अमेरिकालाई अनुरोध गरेका थिए । अनुरोध गरेको दुई महिनापछि आफ्नो परिवारका सदस्यलाई साथै लिएर अफगानिस्तान छोड्न उनी सफल भएका छन् ।
अमेरिकाको विदेश मन्त्रालयले खलीली सुरक्षित रुपमा अफगानिस्तान छोड्न सफल भएको र उनी पाकिस्तान हुँदै अमेरिका आउने जनाएको छ । (बिबीसी)
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
