प्रधानन्यायाधीशका विवादित फैसला संकलन गर्दै बार, राजीनामापछि पनि सम्पती छानविन गर्ने
फरकधार / १ मंसिर, २०७८

नेपाल बार एसोसिएसनका अध्यक्ष चण्डेश्वर श्रेष्ठले प्रधानन्यायाधीश चोलेन्द्र शमशेर जबराले विवादित फैसलागरी अन्यायमा पारेकाहरूलाई ति फैसला उपलब्ध गराउन आव्हान गरेका छन् । 



नेपाल बार एसोसिएसनले बुधवार सर्वोच्च अदालतमा धर्ना दिनुअघि बार भवन परिसरमा कानुन व्यवसायीहरुलाई सम्बोधन गर्दै अध्यक्ष श्रेष्ठले प्रधानन्यायाधीशबाट अन्यायमा परेकाहरुलाई अन्यायमा परेको फैसला बारलाई उपलब्ध गराउन आव्हान गरेका हुन् । 

प्रधानन्यायाधीश जबराको राजीनामा पछि पनि सम्पती विवरण संकलन गरीने र छानविन हुने दाबी उनले गरे । 



‘चोलेन्द्र शमशेर जबराले ऊसँग जोडिएका विकृतिका विवादित फैसलाहरू नेपाल बार एसोसिएसनले संकलन गर्नका लागि आव्हान गरेको छ । तपाई साथीहरु ज–जसलाई यिनले अन्याय पारेका छन्, न्याय किनबेच गरेका छन्, ति फैसलाहरू नेपाल बार एसोसिएसनमा उपलब्ध गराइदिनुहुन अनुरोध गर्दछु । र यिनको राजीनामा पश्चात पनि त्यो फैसला अनुसारको छानविन हुनेछ, उसको सम्पती विवरणहरू हामीले संकलन गर्नेछौँ,’ उनले भने । 



अध्यक्ष श्रेष्ठले प्रधानन्यायाधीशको निर्देशनमा बारको आन्दोलन प्रतिकुल हुनेगरी काम भइरहेको आरोप समेत लगाए । जबराको निर्देशनमा बिचौलियाहरु बारको आन्दोलनविरुद्ध लागेको भन्दै उनले बारको आन्दोलन विरुद्ध नलाग्न चेतावनी दिए । 

‘कार्यक्रम बिथोल्ने किसिमबाट कुनै–कुनै ठाउँमा हाम्रो आव्हानको प्रतिकुलमा काम गरिराखेको, अदालतबाट त्यस्तो भइराखेको, प्रधानन्यायाधीशको निर्देशनमा त्यो काम भएको भन्नेकुरा हामीले जानकारी पाएका छौँ । खबरदार, चोलेन्द्र शमशेरको निर्देशनमा तपाईहरु दुईदिन टिक्नुहोला भोलिका दिनमा तपाईहरु बिचौलिया भएर हिँड्नुभयो भने तपाईंहरुको पनि खैरियत रहने छैन,’ अध्यक्ष श्रेष्ठले भने । 

उनले प्रधानन्यायाधीशको राजीनामा नआएसम्म बारले देशभर आन्दोलन जारी राख्ने बताए । 

 

  • प्रकाशित मिति : मंसिर १, २०७८ बुधबार १५:५९:१६,  

फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया