बैतडीको गोठालापानीनजिक जिप दुर्घटना हुँदा ५ जनाको मृत्यु भएको छ। जिल्ला प्रहरी कार्यालय बैतडीका प्रहरी निरीक्षक (इन्सपेक्टर) दर्शन खड्काले सो जानकारी दिएका हुन् ।
खड्काकाका अनुसार मृत्यु हुनेमा दशरथचन्द नगरपालिका वडा नम्बर ६ का अन्दाजी ४८ वर्षका राजेन्द्रबहादुर चन्द, सोही ठाउँका अन्दाजी ३८ वर्षका धनबहादुर चन्द, अन्दाजी वर्ष ६५ का प्रेम चन्द, अन्दाजी ६५ वर्षका तारासिंह थापा र वर्ष ५८ का खेमसिंह कार्की रहेका छन्।
जीपमा सवार ७ जनामध्ये ५ जनाको घटनास्थलमै मृत्यु भएको र २ जनाको अवस्था गम्भीर रहेको इन्सपेक्टर खड्काले बताए।
गम्भीर घाइते हुनेमा सोही नगरपालिकाका ५८ वर्षका हर्कबहादुर चन्द र जिपचालक डडेल्धुरा घर भएका ४० वर्षका दीपक माली रहेका छन्। दुईजनाको अवस्था चिन्ताजनक भएकाले अस्पताल पठाइएको इन्सेक्टर खड्काले बताए।
बैतडीको दशरथचन्द नगरपालिका २ थलालगाउँबाट जन्ती बोकेर दशरथचन्द नगरपालिका ६ सेरातर्फ जाँदै गरेको म१ज ३१० नम्बरको जिप दशरथचन्द राजमार्गको गोठलापानी–झुलाघाट सडकखण्डअन्तर्गत दशरथचन्द नगरपालिका ४ कलुवाड मोडमा दुर्घटनामा परेको हो।
जिप सडकबाट पाँच सय मिटर तल खसेको बताइएको छ। जिप कसरी दुर्घटना भएको भन्ने केही खुल्न नसकेको प्रहरीले जनाएको छ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
