आइसिसी महिला टि–२० विश्वकप एसिया छनोटमा नेपालले पहिलो जित निकाल्ने क्रममा भुटानलाई ८ विकेटले पराजित गरेको छ ।
भुटानले दिएको ६२ रनको सामान्य लक्ष्य नेपालले ८.३ आभेरमा २ विकेट गुमाउँदै पूरा गर्यो ।
नेपाललाई शानदार जित दिलाउन इन्दु वर्माले अविजित १८ रनको योगदान दिँदा सीता रानामगरले १७ र कप्तान रुविना क्षेत्रीले १० रन जोडे । कविता जोशी ८ रनमा अविजित रहिन ।
भुटानका लागि टाशी चेकीले १ विकेट हात पार्दा १ विकेट रन आउटका रूपमा प्राप्त भयो ।
यसअघि युएईको दुबईस्थित आइसिसी एकेडेमी मैदानमा मंगलबार टस जितेर ब्याटिङ रोजेको भुटानले निर्धारित २० ओभरमा ६ विकेट गुमाउँदै ६१ रन बनाएको थियो ।
भुटानका लागि नगावाङ चोडेनले १३, सोनम पाल्डनले ११ रनको योगदान दिँदा अन्य ब्याटरले दोहोरो अंकमा रन जोड्न सकेनन् ।
नेपालका लागि सीता रानामगरले ३, करुणा भण्डारीले १ विकेट हात पर्दा २ विकेट रन आउटका रूपमा प्राप्त भयो ।
आफ्नो पहिलो खेलमा नेपाल हङकङसँग ६ विकेटले पराजित हुँदा भुटानले कुवेतलाई ४० रनले हराएको थियो ।
नेपालले आफ्नो तेस्रो खेलमा विहिबार कुवेतको सामना गर्दा भुटानले युएईसँग प्रतिस्पर्धा गर्नेछ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
