एमाले नेता लालबाबु पण्डितले आफू कार्यकारी पदबाट बिदा लिएको घोषणा गरेका छन् ।
एमाले महाधिवेशनको बन्दसत्रको तेस्रो दिन सौराहाबाट फर्कँदै गर्दा पण्डितले कार्यकारी पदबाट बिदा लिएको घोषणा गर्दै अन्यलाई शुभकामना दिएका हुन् ।
उनले फरकधारसँग संक्षिप्त कुराकानी गर्दै आफू पार्टीको बागी उम्मेदवार हुन नसक्ने बताए । उनले भने, ‘महाधिवेशनपछि कार्यकारी पदमा नबसेपछि त संगठित सदस्य मात्र हुने भएँ ।’
साथै, उनले आफू बागी उम्मेदवार बनेर पार्टीको छवि बिगार्न नचाहेको बताए । ‘म बागी उम्मेदवार भएर पार्टीको छवि धुमिल बनाउन चाहन्नँ । त्यही भएर उम्मेदवार दिइनँ’, उनले भने,‘मैले उम्मेदवारी दिनुपर्दा बागी दिनुपर्याे । अब बागी चाँहि मेरो खुनमा छैन् ।’
नेतृत्व चयनका लागि भएको यो महाधिवेशनबाट पण्डित उपाध्यक्ष पदमा दाबेदारी प्रस्तुत गरेका थिए । सर्वसम्मतिबाट आफू उपाध्यक्षमा चयन हुने बताउँदै आएका पण्डितको नाम ओलीको लिस्टमा नपरेपछि उनले कार्यकारी पदबाट बिदा लिएको बताएका हुन् ।
महाधिवेशनको बन्द सत्रमा निकै उत्साहित भएर लागेका पण्डित अन्ततः ओलीको लिस्टमा नपरेपछि अहिले सौराहाबाट फर्किसकेका छन् ।
एमाले महाधिवेशनमा सर्वसम्मति नेतृत्व चयनको ओलीको प्रयास असफल भएपछि निर्वाचन प्रक्रिया अघि बढेको छ । मतदाताहरुको अन्तिम नामावली सार्वजनिक हुन बाँकी छ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।