नेपाली कांग्रेसको १४ औं महाधिवेशनको मतगणना जारी छ । पार्टी कार्यालय सानेपामा जारी मतगणनामा अहिलेसम्म शेखर कोइराला प्यानलबाट उम्मेदवार बनेका धनराज गुरुङ र चन्द्र भण्डारीले अग्रता लिएका छन् ।
यसअघि सभापतिका लागि भएको दुई चरणको निर्वाचनपछि शेरबहादुर देउवा विजयी भइसकेका छन् । कांग्रेस पदाधिकारीमा उम्मेदवारी घोषणा गर्दैगर्दा प्यानल परिवर्तन गरेकी सुजता कोइरालाको भने झिनो मत आएको छ ।
अहिलेसम्म ३ हजार मतगणना भइसकेको जनाइएको छ । जसमा सुजताको निकै कमजोर प्रदर्शन देखिएको छ । उनी पूर्वउपप्रधानमन्त्री समेत हुन् । उनी पूर्वप्रधानमन्त्री तथा नेपाली कांग्रेसका पूर्वसभापति स्व. गिरिजाप्रसाद कोइारालाकी पुत्री पनि हुन् ।
संस्थापन इतर समूहमा रहेकी उनले अन्तिम समयमा प्रकाशमान सिंहको टिमलाई साथ दिँदै उम्मेदवारी घोषणा गरेकी थिइन् । तर, मतगणना जारी भइरहँदा उनको मत भने निकै झिनो देखिएको छ ।
उपसभापतिको गणना सकिएपछि महामन्त्रीको गणना सुरु गर्ने निर्वाचन आयोगको तयारी छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
