बैतडीमा जिप व्यवसायीले मनोमानी भाडा असुल गर्न थालेका छन् । जिल्लामा छोटो दूरीमा चल्ने जिपहरूले मनोमानी भाडा असुल गरिरहेका हुन् ।
जिप व्यवसायीले अहिले सतबाँझदेखि गोठलापानीसम्म २५० देखि ३ सय रुपैयाँसम्म भाडा असुल्ने गरेको यात्रुहरूको गुनासो छ ।
पहिला नै जिप चालकले ‘यति दिए मात्रै जान्छौं नत्र जाँदैनौं’ भनेर बार्गेनिङ गर्ने गरेको यात्रुको गुनासो छ । जिपको पछाडि यात्रु बोक्न नपाउँदा आफूहरूलाई घाटा हुने गरेकाले बढी भाडा लिने गरेको चालकहरूको तर्क छ ।
जिल्लामा सवारी दुर्घटना बढ्दै गएपछि ट्राफिक प्रहरीले कडाइ गरेको छ । बोलेरो जिपहरूले ६ सिट मात्रै पास गरेकाले उनीहरूले पछाडि यात्रु बोक्न नपाउने जिल्ला ट्राफिक प्रहरी कार्यालयका प्रमुख प्रहरी सहायक निरीक्षक आकाश रावलले बताए ।
बढी भाडा असुलेको भए आफूहरूलाई खबर गर्न पनि उनले आग्रह गरे । बैतडीमा चालू आर्थिक वर्षको अहिलेसम्म सवारी दुर्घटनामा परेर १५ जनाको मृत्यु भएको छ ।
सवारी दुर्घटना न्यूनीकरणका लागि क्षमताभन्दा बढी यात्रु बोक्न नदिने ट्राफिक प्रहरी प्रमुख रावलले बताए । ‘क्षमताभन्दा बढी यात्रु बोकेका कारणले पनि दुर्घटना हुने गरेका छन् । त्यसैले हामीले पास भएको सीट क्षमता भन्दा बढी यात्रु बोक्न दिएका छैनौं,’ उनले भने ।
चालकहरूलाई समेत ट्राफिक नियमका बारेमा सम्झाउने गरेको समेत रावलले बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
