काठमाडौंको ठमेलमा अनलाइनमार्फत जुवा खेलाउने दुईजनालाई प्रहरीले पक्राउ गरेको छ । ठमेलस्थित एलओडी क्लब अगाडि घनश्याम अम्गाईले सञ्चालन गरेको ठमेल होस्टेलको पाँचौं तलामा अनलाइनमार्फत जुवा खेलाउने दुई जनालाई महानगरीय प्रहरी वृत्त लैनचौरको टोलीले पक्राउ गरेको हो ।
पक्राउ पर्नेमा बाग्लुङ थाइवाङ–९ घर भएका ठमेल होस्टल सञ्चालक राकेश कुमार क्षेत्री र भारतको दिल्ली तिलकनगर घर भएर ठमेल बस्ने जसपाल सिंह रहेका छन् ।
प्रहरीले उनीहरूको साथबाट एक लाख ५५ हजार नगद, सानिमा बैंकको ७४ हजारको चेक, कुमारी बैंकका विभिन्न मिति तथा व्यक्तिका नाममा पठाइएका ५ लाख ६५ हजार बराबरका सात थान भौचर, राष्ट्रिय वाणिज्य बैंकको रेशम राईको नाममा पठाइएको ३२ हजार बराबरको भौचर, नेपाल इन्भेष्टमेन्ट बैंकका विभिन्न व्यक्तिलाई पठाइएका १८ लाख ४९ हजार बराबरको चार थान भौचर, विभिन्न कम्पनीका मोवाईल, नागरिकता, पासपोर्टलगायतका सामग्री बरामद गरिएको प्रहरीले जनाएको छ ।
प्रहरीले केही दिनअघि मात्रै कीर्तिपुरबाट अनलाइनमार्फत जुवा खेलाउने १२ जनालाई पक्राउ गरेको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
