पश्चिमी देशहरूले रुसले आक्रमण गर्न सक्ने भन्दै आफ्ना नागरिकहरूलाई युक्रेन छोड्न आग्रह गरेका छन् ।
अमेरिका, बेलायत, जर्मनीलगायत एक दर्जनभन्दा धेरै देशले आफ्ना नागरिकहरूलाई युक्रेन छोड्न आग्रह गरेका हुन् ।
रुसले युक्रेनी सिमानामा झण्डै एक लाख सेना तैनाथ गरेको छ, तर आक्रमण गर्ने कुनै पनि योजना नभएकाे बताउँदै आएकाे छ ।
अमेरिकी राष्ट्रपति जो बाइडेनले फोनमा रुसी राष्ट्रपति भ्लादिमिर पुटिनलाई आक्रमणबारे चेतावनी दिएका छन् ।
यता, युक्रेनका राष्ट्रपति भ्लादिमिर जेलेन्स्कीले आक्रमणको चेतावनीले मानिसहरूमा त्रास पैदा गर्न सक्ने बताएका छन् ।
ह्वाइट हाउसले आक्रमण जुनसुकै बेला हुनसक्ने र हवाई हमलाबाट सुरु हुन सक्ने चेतावनी दिएको छ ।
अमेरिकी दूतावासका अत्यावश्यक बाहेकका कर्मचारीलाई युक्रेनको राजधानी किभबाट युक्रेन छाड्न आदेश दिइएको छ ।
अमेरिकाले युक्रेनी सैनिकलाई तालिम दिने आफ्ना १५० सैनिकलाई पनि बोलाएको छ । डच मिडियाका अनुसार एक डच एयरलाइन केएलएमले युक्रेनका लागि उडानहरू स्थगित गरेको घोषणा गरेको छ ।
यता, जेलेन्स्कीले यदि पश्चिमी शक्तिहरूसँग तत्काल आक्रमण गर्न सक्ने कुनै बलियो प्रमाण छ भने युक्रेनलाई खबर गर्न आग्रह गरेका छन् ।
अस्ट्रेलिया, इटाली, इजरायल, नेदरल्याण्ड र जापानले पनि आफ्ना नागरिकहरूलाई युक्रेन छोड्न आग्रह गरेका छन् । कतिपय देशले आफ्ना कूटनीतिज्ञ र उनकाे परिवारलाई पनि बाहिर निकालेका छन् ।
यसैबीच, रुसले युक्रेन मुद्दामा पश्चिमी देशहरूले युद्धको उन्माद सिर्जना गरिरहेको बताउँदै आएको छ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
