पाकिस्तान सुपर लिग (पिएसएल) को सातौं संस्करणको उपाधि लाहोर कलन्दर्सले जितेको छ।
उसले गएराति भएको फाइनलमा साविक विजेता मुल्तान सुल्तानलाई ४२ रनले पराजित गर्दै पहिलोपटक उपाधि उचालेको हो ।
१८१ रनको लक्ष्य पछ्याएको मुल्तानले १९.३ ओभरमा सबै विकेट गुमाउँदै १३८ रन मात्र बनाउन सक्यो । उसका लागि खुसदिल शाहले सर्वाधिक ३२ रनको योगदान दिँदा टिम डेविडले २७ र सहान मसुदले १९ रन बनाए ।
लाहोरका लागि कप्तान शहिन शाह अफ्रिदीले ३, मोहम्मद हाफिज र जमान खानले २–२ तथा हरिस रउफ र डेविड विसेले १–१ विकेट हात पार्दा एक विकेट रन आउटमा रूपमा प्राप्त भयो।
यसअघि लोहोस्थित गद्दाफी स्टेडियममा टस जितेर ब्याटिङ रोजेको लाहोरले निर्धारित २० ओभरमा ५ विकेट गुमाउँदै १८० रन बनाएको थियो ।
लाहोरका लागि मोहम्मद हाफिजले सर्वाधिक ६९ रनको योगदान दिए । ४६ बलको सामना गरेका उनले ९ चौका र १ छक्का प्रहार गरे । अविजित रहेका ह्यारी ब्रुकले ४१ र डेविड विसेले २८ रन जोडे ।
मुल्तानका लागि आसिफ अफ्रिदीले ३ तथा डेविड विली र शहनवाज दहनीले १–१ विकेट लिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
