इण्डियन प्रिमियर लिग (आइपिएल) २०२२ मा रोयल च्यालेन्जर्स बैंग्लोरले चौथो जित निकालेको छ । गएराति सम्पन्न खेलमा दिल्ली क्यापिटल्सलाई १६ रनले हराउँदै बैंग्लोरले लिगमा चौथो जित निकालेको हो । उसले ६ म्याच खेल्दा दुई खेलमा भने हार बेहोरेको छ ।
दिल्लीले भने लगातार दोस्रो खेलमा हार बेहोर्यो । आफ्नो पाँचौँ खेलमा बैंग्लोरले दिएको १९० रनको लक्ष्य पछ्याएको दिल्लीले निर्धारित २० ओभरमा ७ विकेट गुमाएर १७३ रन मात्र बनाउन सक्यो । उसका लागि ओपनर डेविड वार्नरले अर्धशतकीय पारी खेले पनि टिमलाई जित दिलाउन भने सकेनन् ।
उनले ३८ बलमा पाँच छक्का र चार चौकासहित ६६ रन बनाए । त्यस्तै, कप्तान ऋषभ पन्त ३४, शार्दुल ठाकुर १७ र पृथ्वी शा १६, मिचेल मार्श १४ रनमा आउट भए । अक्षर पटेल र कुलदीप यादव १०/१० रनमा अविजित रहे ।
बैंग्लोरका जोश हेजलउडले तीन, मोहम्मद सिराजले दुई र वानिन्दु हसरंगाले एक विकेट लिए । त्यसअघि मुम्बईस्थित वानखडे स्टेडियममा टस हारेर ब्याटिङको मौका पाएको आरसिबीले निर्धारित २० ओभरमा ५ विकेट गुमाएर १८९ रन बनाएको थियो ।
उसका लागि दिनेश कार्तिक र ग्लेन म्याक्सवेलले आक्रामक पारी खेले । कार्तिकले ३४ बलमा पाँच छक्का र पाँच चौकासहित अविजित ६६ रन बनाए । म्याक्सवेलले ३४ बलमा सात चौका र दुई छक्काको सहयोगमा ५५ रनको योगदान दिए । सहबाज अहमद ३२ रनमा अविजित रहे ।
कप्तान फाफ डुप्लेसिस आठ, विराट १२ र सुयश प्रभुदेसाई ६ रनमा आउट भए । दिल्लीका लागि कुलदीप यादव, अक्षर पटेल, खलिल अहमद र शार्दुल ठाकुरले एक/एक विकेट लिए । यो जितसँगै बैंग्लोर तेस्रो स्थानमा उक्लिएको छ । चार अंक जोडेको दिल्ली भने तालिकाको आठौँ स्थानमा छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
