नेकपा एमाले अध्यक्ष तथा पूर्वप्रधानमन्त्री केपी शर्मा ओलीले संघीय सरकार कमिसनको लोभमा फसेर अर्बौ रुपैयाँको स्वास्थ्य सामग्री खरिद गर्ने तयारी गरिरहेको आरोप लगाएका छन् ।

मे दिवसको सन्दर्भ पारेर आइतबार हेटौंडामा आयोजना गरिएको सभालाई सम्बोधन गर्दै ओलीले सरकारले चुनावको मुखमा कमिसनको लोभमा फसेर स्वास्थ्य सामग्री खरिद गर्न लागेको आरोप लगाएका हुन् ।

‘अर्बौंको औषधि, सिटी स्क्यान, एक्स-रे मेसिन खरिद गर्ने तयारी भइरहेको छ । कुनै अस्पताल, डाक्टरलाई चाहिएर खरिद गर्न लागिएको होइन । कमिसन चाहिएर खरिद गर्न लागिएको हो,’ उनको आरोप थियो ।

उनले स्वास्थ्यमन्त्री विरोध खतिवडाप्रति लक्षित गर्दै यस्तो अभिव्‍यक्ति दिएका हुन् । मकवानपुर स्वास्थ्यमन्त्री खतिवडाको गृहजिल्ला हो । उनले २४ लाख कोरोना भ्याक्सिन हराएको विषयमा समेत टिप्पणी गरे । ‘२४ लाख कोरोनाको भ्याक्सिन क्याप्सुल निले जसरी स्वाट्टै निल्यो । अब अर्बौंको औषधि खरिद हुँदैछ', उनले भने ।

उनले सत्तारूढ गठबन्धनको सरकार विकास गर्न नभएर देशलाई कंगाल पार्न जन्मिएको आरोप लगाए । ‘यो सरकार खानलाई जन्मिएको हो । विकास गर्न होइन’, ओलीले भने ।

सत्तारूढ गठबन्धन बाध्यताले चुनाव गर्न थालेको उनले बताए । ‘सरकार अझै पनि चुनाव बिथोल्न खोजिरहेको छ । १२ दिनपछि चुनाव हुँदैछ । तर, गठबन्धन चुनाव हुन नदिने बहाना खोजिरहेको छ ।’

उनले निर्वाचन संविधानअनुसार दुई महिना अगाडि फागुनमा हुनुपर्ने बताए । ‘गठबन्धन संविधानको पालना गर्ने सरकार भए फागुनमै चुनाव हुन्थ्यो’, उनले थपे ।

ओलीले आफ्नो दलले जनमतबाटै तीन तहको सरकार निर्माण गर्ने दाबीसमेत गरे । उनले अहिलेको गठबन्धन सरकार परामेदशबाट निर्माण भएको टिप्पणी गर्दै जनादेशबाट जवाफ  दिने बताए । ‘हामी परमादेशको जवाफ जनादेशबाट दिन्छौँ । हामी जनमतबाटै तीन तहको सरकार बनाउँछौँ ।’  

उनले देशभर एमालेमा देखिएको उत्साहका कारण सत्ता गठबन्धन आतंकित भएको टिप्पणी गरे । ‘स्थानीय तहको निर्वाचन नजिकिरहँदा हाम्रा कार्यकर्तामा उत्साह भरिएको छ । हामीलाई सिध्याउन निर्माण भएको गठबन्धन त्रसित अवस्थामा पुगेको छ’ उनले भने ।

ओलीले कांग्रेसप्रति टिप्पणी गर्दै भने, ‘कांग्रेसको देश बनाउने नीति नै छैन । एमालेलाई धारे हात लगाउने मात्र हो ।’ कांग्रेसले स्थानीय तह निर्वाचन लक्षित गरेर जारी गरेको घोषणा पत्रमा आफ्नो नाम ४२ ठाउँमा लेखिएको उनले बताए ।

‘कांग्रेसको घोषणापत्रमा कांग्रेस सभापतिको नाम ८ ठाउँमा मात्र छ । मेरो नाम ४२ ठाउँमा छ । १०८ ठाउँमा हुनुपर्ने थियो ।’ उनले कार्यकर्तालाई ३० वैशाखको निर्वाचनमा सत्ता गठबन्धनलाई पाहा पछारे जसरी पछारेर मात्र निदाउन आग्रह गरेका छन् ।