भारतमा जारी १५ औं सिजनको इण्डियन प्रिमियर लिग (आइपिएल) अन्तर्गत कोलकाता नाइट राइडर्स (केकेआर) विरुद्ध मुम्बई इण्डियन्स ५२ रनले पराजित भएको छ । गएराति सम्पन्न खेलमा कोलकाताले दिएको १६६ रनको लक्ष्य पछ्याएको मुम्बईले १७.३ ओभरमा सबै विकेट गुमाएर ११३ रन मात्र बनाउन सक्यो ।
उसका लागि इशान किशनले ४३ बलमा चार चौका र एक छक्कासहित ५१ रन बनाए । किरण पोलार्ड १५, टिम डेविड १३ र रमनदीप सिंह १२ रनमा आउट भए । बाँकी ब्याटरले भने दोहोरो अंकमा समेत रन जोड्न सकेनन् ।
केकेआरका लागि प्याट कमिन्सले तीन, आन्द्रे रसेलले दुई, वरुण चक्रवर्ती र टिम साउदीले एक/एक विकेट हात पारे । केकेआरले तीन विकेट भने रन आउटको रूपमा प्राप्त गर्यो । त्यसअघि मुम्बईस्थित डिवाइ पाटिल स्टेडियममा टस हारेर ब्याटिङको मौका पाएको कोलकाताले निर्धारित २० ओभरमा ९ विकेट गुमाएर १६५ रन बनायो ।
उसका लागि वैंकटेश अय्यर, नितिश राणाले ४३/४३ र रिंकु सिंहले अविजित २३ रन बनाए । बाँकी ब्याटरले भने दोहोरो अंकमा समेत रन जोड्न सकेनन् । मुम्बईका लागि जसप्रित बुमराहले ४ ओभरमा एक मेडनसहित १० रन दिएर महत्वपूर्ण पाँच विकेट लिए ।
आइपिएलमा बुमराहको यो हालसम्मकै उत्कृष्ट स्पेल हो । यसअघि आइपिएलमा उनको उत्कृष्ट बलिङ १४ रन दिएर ४ विकेट लिनु थियो । यो जितसँगै कोलकाताले प्लेअफ पुग्ने सम्भावना जीवितै राखेको छ । उसले १२ खेलमा सातमा हार र पाँच खेलमा जित हात पारेको छ । प्लेअफ पुग्न कोलकाताले अब बाँकी दुई खेलमा लगातार जितका साथै अन्य टिमको नतिजा पनि हेर्नुपर्नेछ ।
मुम्बई भने यसअघि नै प्लेअफ दौडबाट बाहिरिसकेको छ । उसले ११ म्याच खेल्दा ९ मा हार र दुई खेलमा मात्र जित हात पारेको छ । कोलकाता जितका साथ तालिकाको सातौंमा उक्लिँदा मुम्बई भने पुछारमा छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।