इण्डियन प्रिमियर लिग (आइपिएल) अन्तर्गत गएरातिको खेलमा दिल्ली क्यापिटल्स विजयी भएको छ । ऊ पञ्जाब किंग्सलाई १७ रनले हराउँदै विजयी भएको हो ।
जितसँगै दिल्ली अंक तालिकाको चौथो स्थानमा उक्लिएको छ । १६० रनको लक्ष्य पछ्याएको पन्जाबले २० ओभर नै ब्याटिङ गरे पनि ९ विकेट गुमाएर १४२ रन मात्र बनाउन सक्यो ।
उसका लागि जितेश शर्माले सर्वाधिक ४४ रनको योगदान दिए । ३४ बलको सामना गरेका उनले तीन चौका र दुई छक्का प्रहार गरे । राहुल चाहरले अविजित २५, जोनी बेरिस्टोले २८ र शिखर धवनले १९ रन जोडे ।
दिल्लीका शार्दुल ठाकुरले चार, अक्षर पटेल र कुलदीप यादवले दुई/दुई तथा एनरिक नोर्टजेले एक विकेट लिए । त्यससअघि मुम्बईस्थित डिवाइ पाटिल स्पोर्ट्स एकेडेमी मैदानमा टस हारेर ब्याटिङको निम्तो पाएको दिल्लीले निर्धारित २० ओभरमा सात विकेट गुमाउँदै १५९ रन बनाएको थियो ।
उसका लागि मिचेल मार्शले ६३ रनको अर्धशतकीय पारी खेले । ४८ बलको सामना गरेका उनले चार चौका र तीन छक्का प्रहार गरे । सर्फराज खानले ३२, ललित यादवले २४ र अक्षर पटेलले अविजित १७ रन बनाए । पन्जाबका लियाम लिभिङ्गस्टोन र अर्शदीप सिंहले तीन/तीन तथा कागिसो रबाडाले एक विकेट लिए ।
यो जितसँगै प्लेअफ सम्भावना कायमै राखेको दिल्लीले १३ खेलमा १४ अंक जोडेको छ । पराजयसँगै प्लेअफ सम्भावना कमजोर बनेको पञ्जाब १३ खेलबाट १२ अंकका साथ सातौं स्थानमा छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
