कैलालीको जोशीपुर गाउँपालिकामा रेशम चौधरीको नागरिक उन्मुक्ति पार्टीका तर्फबाट वडाध्यक्ष महिला निर्वाचित भएकी छन् । वडा नं ३ को वडाध्यक्षमा रेणुकुमारी डगौरा प्यानलसहित निर्वाचित भएकी हुन् ।
उनी ६१५ मत प्राप्त गरेर निर्वाचित भएकी हुन् । उनले नेपाली कांग्रेसका तर्फबाट वडाध्यक्षका उम्मेदवार किशोर कठरियालाई २२ मतको अन्तरले पराजित गरेको निर्वाचन अधिकृतको कार्यालयले जनाएको छ ।
कैलाली जिल्लाका १३ वटा स्थानीय पालिकामध्ये वडाध्यक्षमा निर्वाचित हुने डगौरा पहिलो महिला भएको जनाइएको छ । मुख्य निर्वाचन अधिकृत जयनन्द पनेरुका अनुसार उनीबाहेक अरु कोही पनि महिला कैलालीमा वडाध्यक्षमा निर्वाचित भएका छैनन् ।
उनीसँगै वडा नं ३ को महिला सदस्यमा फूलमती डगौरा, दलित महिला सदस्यमा शीतल श्रेष्ठ विक, खुला सदस्यमा राजेशकुमार चौधरी र ज्ञानप्रसाद महतो निर्वाचित भएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
