बझाङका १२ वटै स्थानीय तहको मतगणना सकिएसँगै अन्तिम मत परिणाम सार्वजनिक भएको छ । जिल्लाका दुई नगरपालिका र १० गाउँपालिकामा नेपाली कांग्रेसले ६, नेकपा एमाले ३, नेकपा माओवादी केन्द्रले २ र नेकपा एकीकृत समाजवादीले १ स्थानीय तहमा जित हासिल गरेका छन् ।
नेपाली कांग्रेसले वित्थडचिर, सुर्मा, मष्टा, खप्तडछान्ना गाउँपालिका, बुङ्गल र जयपृथ्वी नगरपालिकाको प्रमुखमा जित हात पारेको छ । नेकपा एमाले साइपाल, तल्कोट र थलारा गाउँपालिकामा विजयी भएको छ । नेकपा माओवादी केन्द्रले दुर्गाथली र छविसपाथीभेरा गाउँपालिकाको प्रमुखमा जित हात पारेको छ भने केदारस्युँ गाउँपालिकामा नेकपा एकीकृत समाजवादीले जित हात पारेको छ ।
यस्तै, पालिकाको उपप्रमुख पदमा भने नेपाली कांग्रेसले ५, एमालेले २, माओवादी केन्द्रले ३ र समाजवादीले २ स्थानीय तहमा जित हात पारेको छ । नेपाली कांग्रेसले सुर्मा, दुर्गाथली, केदारस्युँ, थलारा र वित्थडचिर गाउँपालिका, नेकपा एमालेले तल्कोट र साइपाल गाउँपालिका, नेकपा माओवादी केन्द्रले खप्तडछान्ना, मष्टा गाउँपालिकामा र जयपृथ्वी नगरपालिकामा उपप्रमुख पदमा विजयी भएको छ । यस्तै, नेकपा एकीकृत समाजवादीले बुंगल नलरपालिका र छविस पाथिभेरा गाउँपालिकामा उप जितेको छ ।
बझाङको केदारस्युँ गाउँपालिकामा विजयी भएसँगै सुदूरपश्चिम प्रदेश सभाको ठूलो दल एकीकृत समाजवादी आफ्नो साख जोगाएको छ । स्थानीय तह निर्वाचनका लागि समाजवादीले प्रदेशभर प्रमुख/अध्यक्षमा ४१ र उपप्रमुख/उपाध्यक्षमा ३५ उम्मेदवार उठाएको थियो ।
प्रदेशसभामा ठूलो दल भए पनि स्थानीय तहको निर्वाचनको मतपरिणाम हेर्दा निकै कमजोर देखिएको छ । प्रदेशका अन्य जिल्लामा प्रमुख उपप्रमुख पदमा निर्वाचित हुन नसकेको समाजवादीले बझाङमा भने एउटा गाउँपालिका अध्यक्ष र दुई गाउँपालिका उपाध्यक्षमा जित हासिल गरेको छ । नयाँ पार्टी भएको र निर्वाचनका बेला गठबन्धनको भरमा निर्वाचनमा होमिनु र समय अभावका कारण चुनाव चिन्हलाई जनतामाझ लग्न नसकेकाले निर्वाचनमा राम्रो परिणाम आउन नसकेको समाजवादीका नेता बताउँछन् ।
जिल्लाका ९४ वडामध्ये नेपाली कांग्रेसले ३१ नेकपा एमालेले २७ नेकपा माओवादी केन्द्रले ११ र नेकपा एकीकृत समाजवादीले १६ वडामा वडाध्यक्ष जितेको छ । जिल्लाभर ८ जना स्वतन्त्र उम्मेदवारले वडाध्यक्षमा जित हासिल गरेका छन् ।
कांग्रेसले जितेका पालिका
१) जयपृथ्वी नगरपालिका- प्रमुख कांग्रेसका चेतराज बजाल र उपप्रमुखमा नेकपा माओवादी केन्द्रका रतन सिंह
२) बुंगल नगरपालिका प्रमुख कांग्रेसका जयबहादुर धामी र उपप्रमुखमा नेकपा एकीकृत समाजवादीका धनबहादुर बोहरा
३) मष्टा गाउँपालिका अध्यक्ष कांग्रेसका ज्ञानबहादुर बोहरा र उपाध्यक्षमा नेकपा माओवादी केन्द्रका हर्क धामी
४) खप्तडछान्ना गाउँपालिका अध्यक्ष कांग्रेसका उत्तम रोकाया र उपाध्यक्षमा नेकपा माओवादी केन्द्रका विष्णु थापा
५) बित्थडचिर गाउँपालिका अध्यक्ष/उपाध्यक्ष दुवैमा कांग्रेसका अम्मरसिंह महर र लक्ष्मी मल्ल
६) सुर्मा गाउँपालिका अध्यक्ष/उपाध्यक्ष कांग्रेसका खडकबहादुर बोहरा र रमलाकुमारी मण्डेल पुजारा
एमालेले जितेका पालिकाहरू
१) साइपाल गाउँपालिका अध्यक्ष/उपाध्यक्ष एमालेका मानबहादुर बोहोरा र डोल्मा तामाङ
२) थलारा गाउँपालिका अध्यक्ष एमालेका प्रकाश रोकाया र उपाध्यक्षमा कांग्रेसका राम खाती
३) तलकोट गाउँपालिका अध्यक्ष/उपाध्यक्ष दुवैमा एमालेका कलकबहादुर रोकाया र पार्वती भण्डारी
माओवादीले जितेका पालिका
१) दुर्गाथली गाउँपालिका अध्यक्ष माओवादी केन्द्रका दिलबहादुर थापा र उपाध्यक्षमा नेपाली कांग्रेसका जनक दौल्याल
२) छबिसपाथिभेरा गाउँपालिका अध्यक्ष माओवादी केन्द्र बसन्त चलाउने र उपाध्यक्षमा एकीकृत समाजवादीका लक्ष्मण बोहरा
एकीकृत समाजवादीले जितेका पालिकाहरु
१) केदारस्युँ गाउँपालिका अध्यक्ष एकीकृत समाजवादीका गणेश बोहरा र उपाध्यक्ष नेपाली कांग्रेसकी मनिषा धामी
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
