जनकपुरधाम उपमहानगरपालिकाको २५ मध्ये १४ वडाको मतपरिणाम सार्वजनिक भएको छ । जसमध्ये ८ वडामा कांग्रेस, तीनमा एमाले, एकमा लोसपा, एकमा स्वतन्त्र र एक वडामा तमलोपाका उम्मेदवार निर्वाचित भएका छन् ।

वडा नम्बर–१ को वडाध्यक्षमा नेपाली कांग्रेसका दीपनारायण यादव १ हजार १४३ मतसहित निर्वाचित भइसकेका छन् भने वडा नम्बर–२ को वडाध्यक्षमा पनि नेपाली कांग्रेसकै शिवकुमार साह ६११ मतसहित निर्वाचित भइसकेका छन् ।

वडा नम्बर–३ को वडाध्यक्षमा तमलोपाका दिपेन्द्र साह २७६ मत ल्याई निर्वाचित भएका हुन् भने वडा नम्बर–४ को वडाध्यक्षमा नेपाली कांग्रेसका सुरेश झा पण्डित ८३३ मत प्राप्त गरी निर्वाचित भएका छन् ।

त्यस्तै, वडा नम्बर–५ को वडाध्यक्षमा नेकपा एमालेका बेचन साह २९१ मत ल्याएर निर्वाचित भइसकेका छन् भने वडा नम्बर–६ को वडाध्यक्षमा नेपाली कांग्रेसका दिनेश साह ३३१ मत प्राप्त गरि विजयी भइसकेका छन् ।

वडा नम्बर–७ मा नेपाली काँग्रेसका उम्मेदवार निरज साह (मुन्ना) प्यानलसहित निर्वाचित भएका छन् ।

साह ७६४ मतको फराकिलो अन्तरले निर्वाचित भए । साहले १०५९ मत ल्याएर विजयी हुँदा उनका निकटतम प्रतिद्वन्द्वी नेकपा एमालेका उम्मेदवार नाजिर हुसैन २९५ मतमा सीमित भए । त्यस्तै, लोसपाका रामबाबु साहले २३५ मत ल्याए ।
त्यस्तै, वडा नम्बर–८ मा नेकपा एमालेका उम्मेदवार दिनेश सिंह निर्वाचित भएका छन् ।

सिंह ५४७ मतको फराकिलो अन्तरले निर्वाचित भए । सिंहले ९०६ मत ल्याएर निर्वाचित हुँदा उनका निकटतम प्रतिद्वन्द्वी नेपाली कांग्रेसका उम्मेदवार सुरेन्द्र शर्मा ३५९ मतमा सिमित भए ।

वडा नम्बर–९ नेपाली कांग्रेसका परमेश्वर साह दोस्रो कार्यकालका लागि पुनः निर्वाचित भएका छन् । 

साहले ३५६ मत प्राप्त गरी निर्वाचित हुँदा उनका निकटतम प्रतिद्वन्द्वी जसपा नेपालका बलिराम साहले ३१७ मत मात्र पाएका छन् । 

त्यस्तै, वडा नम्बर–२१ मा पनि नेपाली कांग्रेसका उम्मेदवार निर्वाचित भएका छन् । 

सो वडाको वडाध्यक्षमा कांग्रेसका राज नारायण साहले १ हजार ८०४ मत ल्याएर निर्वाचित हुँदा उनका निकटतम प्रतिद्वन्द्वी नेकपा एमालेका जयप्रकाश महासेठले १ हजार २६८ मत पाएका छन् । 

वडा नम्बर–२२ मा लोकतान्त्रिक समाजवादी पार्टी नेपालका उम्मेदवार बिमलेश मिश्र प्यानलसहित निवाएचित भएका छन् ।

मिश्र ७२ मतको अन्तरले निर्वाचित भएका छन् । मिश्रले २४५ मत ल्याएर विजयी हुँदा उनका निकटतम प्रतिद्वन्दी जनमत पार्टीका उम्मेदवार नागिन्द्र मण्डल १७३ मतमा सिमित भए ।

वडा नम्बर–२३ मा स्वतन्त्र उम्मेदवार राघवेन्द्र प्रसाद साह ८४१ मत ल्याएर निर्वाचित भइसकेका छन् । उनका निकटतम प्रतिद्वन्द्वी लोसपाका रामनन्दन साहले ७५१ मत ल्याएका छन् ।

त्यस्तै, वडा नम्बर–२४ मा नेकपा एमालेका उम्मेदवार उपेन्द्र सहनी १ हजार १४४ मत ल्याएर निर्वाचित भइसकेका छन् ।

वडा नम्बर–२५ मा नेपाली काँग्रेसका उम्मेदवार चन्देश्वर साह प्यानलसहित निर्वाचित भइसकेका छन् । साह ७०६ मत ल्याएर विजयी भएका छन् ।