एमाले महासचिवले भने– निजगढ विमानस्थल निर्माणमा रोक लगाउने सर्वोच्चको फैसला त्रुटिपूर्ण
फरकधार / १३ जेठ, २०७९

प्रमुख प्रतिपक्षी दल नेकपा एमालेका महासचिव शंकर पोखरेलले निजगढ अन्तर्राष्ट्रिय विमानस्थल निर्माणमा रोक लगाउने सर्वोच्च अदालतको फैसला गलत भएको बताएका छन् ।  



उनले आज बिहान सामाजिक सञ्जालमार्फत निजगढमा विमानस्थल निर्माणमा रोक लगाउने सर्वोच्चको फैसला त्रुटिपूर्ण र राष्ट्रिय हितविरुद्ध रहेको बताएका हुन् । ‘राजधानी काठमाडौंको भविष्यको आवश्यकतालाई दृष्टिगत गरी निजगढमा फास्ट ट्रयाकसहित बनाउन लागिएको अन्तर्राष्ट्रिय विमानस्थल बनाउन नपाउनेगरी सर्वोच्च अदालतले गरेको फैसला न्यायिक दृष्टिले त्रुटिपूर्ण र राष्ट्रिय हित विरुद्धमा छ,’ पोखरेलले फेसबुकमा लेखेका छन् । 

कार्यकारीको काममा यस्तो हस्तक्षेप न्यायिक सक्रियताको गलत बाटो भएको महासचिव पोखरेलको भनाइ छ । उनले सर्वोच्चको निर्णयले फास्ट ट्रयाकमा भएको लगानीलाई समेत डुबाउने र मुलुकलाई आर्थिक संकटमा फसाउने पनि उल्लेख गरेका छन् । 



‘वातावरणमा पर्ने असरको प्रतिस्थापन गर्ने कानुनी व्यवस्थाको पालनामा ध्यान दिनुको साटो कार्यकारीको भूमिकामा नै हस्तक्षेप गरी निर्माण कार्यमा नै रोक लगाउनु बुझि नसक्नुको न्यायिक सकृयता हो । यसप्रकारको फैसलाले न्यायिक प्रणालीप्रतिको आस्था र विश्वासलाई कमजोर बनाउँछ । राष्ट्रिय सामर्थ्यको निर्माणको संकल्पमा समेत वाधा पुर्याउँछ । सबै सरोकारवाला गम्भीर र जिम्मेवार बनौँ,’ पोखरेलले लेखका छन् । 



  • प्रकाशित मिति : जेठ १३, २०७९ शुक्रबार ७:४४:१९,  

फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया