वामदेव गौतमले गत मंगलबार काठमाडौंमा पत्रकार सम्मेलन गरी नेकपा राष्ट्रिय एकता पार्टी घोषणा गरे । कम्युनिष्ट आन्दोलन धराशयी बनेको भन्दै उनले नयाँ राजनीति दल खोल्नु परेको घोषणा कार्यक्रममा बताएका थिए ।
नेकपाबाट एमाले, माओवादी केन्द्र र एकीकृत समाजवादी अलग-अलग भएपछि गौतम आफू संयोजक बनेर वामपन्थी एकताको अभियान चलाइरहेका थिए । अहिले आफ्नै नेतृत्वमा पार्टी खेलेपछि पनि गौतमले भेटघाटलाई भने निरन्तरता दिएका छन् ।
बिहीबार एमाले अध्यक्ष केपी शर्मा ओलीसँग भेटवार्ता गर्न उनी बालकोट पुगेका थिए । भेटमा गौतमले ओलीसमक्ष वाम गठबन्धन गरेर निर्वाचन लड्न प्रस्ताव गरेका थिए ।
उनले प्रतिनिधिसभा र प्रदेशसभाको निर्वाचनमा कम्युनिष्ट शक्तिहरूको तालमेलको प्रस्ताव गरेका हुन् । ‘आफू–आफू चुनाव लड्ने हो भने कम्युनिष्टहरूको हार निश्चित छ, त्यसैले प्रतिनिधि र प्रदेशसभा निर्वाचनमा मिलेर चुनाव लडौँ,’ गौतमले ओलीसँग भनेका थिए ।
ओलीसँग भेट गर्न बालकोट पुगेका गौतमले माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालसँग पनि भेट गरिसकेका छन् । प्रचण्ड र नेपाल पनि गौतमको प्रस्तावप्रति सकारात्मक रहेको बताइएको छ ।
गौतमले एकैदिन शीर्ष तीनै नेतालाई भेटेका हुन् । कम्युनिस्ट आन्दोलनलाई एकीकृत गर्ने मूल उद्देश्यले भेटघाट गरेको बताउँदै गौतमले आफूले राखेको कुरामा ओली, दाहाल र नेपाल सकारात्मक रहेकाे बताएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
