बाढी पहिरोले लमजुङ जिल्लाका विभिन्न स्थानका वडा कार्यालय, विद्यालयदेखि बस्ती समेत जोखिममा परेका छन् । दोर्दी गाउँपालिका–७ को वडा कार्यालय, महेन्द्र ज्योति प्राथमिक विद्यालय भवन र फलेनी बस्ती जोखिममा परेको स्थानीय निरा घिमिरेले बताइन ।
निरन्तरको वर्षाले पहिरो जान थालेसँगै जोखिम बढेको वडाध्यक्ष रिसमाया गुरुङले बताए । 'उपल्लो माँझखर्कमा रहेको वडा कार्यालय भवनलाई पहिरोले घेरेको छ भवनमाथिको सडकबाट खसेको पहिरो भित्तासम्म आइपुगेको छ । भवनको पछाडिको भागसम्म ढुङ्गा मुढा र माटो थुप्रिएको छ । अझै पानी परिरहे भवन नै बगाउने जोखिम छ', उनले भने, 'पहिरोले जताततै लेदो थुपारेको र लेदो फाल्दै कार्यालय सञ्चालन गर्दै आइएका छौं।' पहिराले नजिकैको महेन्द्र ज्योति प्राविको भवन पनि जोखिममा पारेको छ। उक्त विद्यालयको कक्षाकोठामै भल पस्ने गरेको वडा कार्यालयले जनाएको छ।
वडाध्यक्ष गुरुङले भने, 'पहिरो निरन्तर गइरहन्छ, लेदो वडा कार्यालयभित्र छिर्छ सफा गर्दै काम गछौँ ।' वडा कार्यालयको करिब २० मिटरमाथि सडकबाट आएको पहिरो रोक्न ५ असारमा गाउँपालिकाबाट दुई लाख बजेट ल्याएर तार जालीसहित पर्खाल उठाइएको थियो । तर पहिराले थप क्षति पुर्याउनुका साथै अन्य दुई स्थानका सडक बगाएको छ ।
पहिराेले बस्तीका १० घर पनि जोखिममा पारेका छन् । यही १ असारमा र त्यसपछि बेला–बेलामा खसिरहेको पहिरोले कोषलाल गुरुङ, प्रेम गुरुङलगायतको घर जोखिममा परेको स्थानीय केशव गुरुङले बताए । उनले भने, 'बर्खा लागेसँगै राम्रोसँग निदाउन सकेको छैन । पहिरो आउँछ की भनेर रातभर जाग्राम बस्नुपर्छ । उनी मात्र होइन गाउँका अधिकांशको पीडा उस्तै छ । उनीहरूले गाउँपालिकाले आफूहरूलाई सुरक्षित ठाउँमा स्थानान्तरण गर्नुपर्ने बताउँदै आएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
