बैतडीको डिलासैनी गाउँपालिकाले मतदाता संख्याबराबर कागतीका बोट वितरण गरेको छ । गाउँपालिकाभरका व्यावसायिक किसानका साथै अन्य किसानलाई कागतीका बोट वितरण गरिएको गाउँपालिकाका प्रवक्ता यज्ञराज भट्टले बताए ।
फलफूलको बगैँचा स्थापना गर्ने किसान, कृषि सहकारी संस्था, कृषि फर्मलगायतलाई आवश्यकताअनुसार बोटबिरुवा वितरण गरिएका छन् भने अन्य किसानलाई कागतीका बोट वितरण गरिएको प्रवक्ता भट्टले बताए ।
गाउँपालिकाभरि १३ हजार ५ सय कागतीका बिरुवा निःशुल्क रुपमा वितरण गरिएका हुन् ।
कागतीका विरुवा रोप्ने किसानका लागि सूचना आह्वान गरिएको र सोही सूचनाका आधारमा आवेदन दिने किसान, कृषि सहकारी संस्था, कृषि फर्मलगायतलाई कागतीका बोट वितरण गरिएका गाउँपालिका अध्यक्ष सन्तोषप्रकाश जोशीले बताए ।
आफूले मतदाता संख्या बराबर वृक्षारोपण गर्ने घोषणा गरेको र सोहीअनुसार कागतीका बोट वितरण गरिएका उनले बताए । सातवटै वडा कार्यालयमार्फत किसानलाई कागतीका बिरुवा वितरण गरिएको हो ।
कागतीका बिरुवा लगाउने पूर्वतयारी गरेका किसानलाई विरुवा वितरण गरेको बताइएको छ । किसानलाई फलफूल खेतीका माध्यमबाट आत्मनिर्भर बनाउने उद्देश्यसहित फलफूलका विरुवा वितरण गरिएका अध्यक्ष जोशीले बताए ।
सिजनअनुसार अन्य फलफूलका बिरुवा पनि वितरण गर्ने योजना रहेको गाउँपालिकाले जनाएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
