नेपाल र मोरक्कोबीच पहिलोपटक द्विपक्षीय परामर्श संयन्त्रको बैठक बसेको छ । बैठक मोरक्कोको राबाटमा भएको हो ।
नेपाल र मोरक्कोबीच सन् २०१७ मा दुई देशका परराष्ट्र मन्त्रालयबीच द्विपक्षीय परामर्श संयन्त्र स्थापना गर्ने सम्झौता भएको थियो । स्थापना भएपछि संयन्त्रको बैठक बस्न सकेको थिएन ।
स्थानीय समयअनुसार बिहीबार बसेको संयन्त्रको पहिलो बैठकमा नेपाल–मोरक्को सम्बन्धका सबै आयामहरुमा छलफल गरिएको थियो । द्विपक्षीय सहयोगलाई थप मजबुत बनाउने विषयमा पनि छलफल भएको परराष्ट्र मन्त्रालयले जनाएको छ ।
आर्थिक, प्राविधिक, पर्यटन, साँस्कृतिक सहयोग र मानव संसाधन विकास लगायतका क्षेत्रमा सहायता बढाउने विषयमा बैठकमा छलफल भएको थियो ।
बैठकमा जलवायु परिवर्तन, आप्रवासन, राष्ट्रसंघिय शान्ति मिसनमा योगदान र क्षेत्रिय आर्थिक सहायता लगायतका विश्वव्यापी मुद्दामा पनि छलफल भएको परराष्ट्रले जनाएको छ ।
बैठकमा नेपालको नेतृत्व परराष्ट्र सचिव भरतराज पौड्यालले गरेका थिए भने मोरक्कोको नेतृत्व मोरक्को विदेश मन्त्रालयको एसिया विभागका निर्देशक अब्देलकादर एल अन्सारीले गरेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
