अस्ट्रेलियामा नेपालीलाई आइटीमा अवसर
आइटीमा करिअर बनाउन सहयोग गर्न जुटे नेपाली
फरकधार / १६ साउन, २०७९

कोरोना महामारीपछि अस्ट्रेलियामा आइटीको क्षेत्रमा दक्ष जनशक्तिको ठूलो माग छ। विशेष गरेर सफ्टवेयर डेभलपमेन्ट, इकमर्स, वेब डेभलपमेन्ट, नेटवर्किङ जस्ता क्षेत्रमा नेपालीहरूले करिअर र जागिरको अवसर राम्रै पाउन थालेका छन्। 



अस्ट्रेलियाको नागरिक तथा स्थायी बासिन्दा भएकाले मात्र होइन विद्यार्थीका रुपमा पढि रहेकाहरूले पनि राम्रो भूमिका र तलब पाउन थालेका हुन् । यतिखेर सफ्टवेयर डेभेलोपर तथा प्रोग्रामरको रूपमा काम गरेर वार्षिक एक लाख डलरभन्दा बढी कमाउने नेपालीको संख्या अस्ट्रेलियामा उल्लेख्य छ । नेटवर्किङको क्षेत्रमा पनि ‘हेल्प डेस्कर सपोर्ट’मा काम पाउने विद्यार्थीहरू धेरै हुन थालेका छन्। 

अस्ट्रेलियामा सफ्टवेयर डेभलपमेन्टको तालिम दिने संस्था ‘डेन्टेड कोड’ मार्फत भारतीय, फिलिपिन्स, मोरक्को, इन्डोनेसिया साथै नेपालका विद्यार्थीहरूलाई दक्ष जनशक्तिका रूपमा अस्ट्रेलियाको आइटी उद्योगमा करिअर बनाउन सहयोग गरिरहेका प्रेम आचार्य आइटीको क्षेत्रमा नेपाली विद्यार्थीहरूले पनि राम्रा अवसरहरू पाउन सक्ने बताउँछन्। 



‘सीप हुनेलाई त अवसर छँदै छ, सीप विकास गर्छु भन्नेले पनि समर्पित भएर लाग्ने हो भने यो क्षेत्रमा राम्रो अवसर छ’, उनले भने । आचार्यको अनुभवमा सबै रोजगारदाता र क्षेत्रमा अनुभवी मात्र खोज्ने भन्ने हुँदैन, बजारमा माग भएका सीप सिक्ने हो भने सीप भएकै आधारमा पनि राम्रा अवसर सजिलै पाउन सकिन्छ। 



आइटीमा करिअर बनाउन सहयोग गर्न जुटे नेपाली 
अस्ट्रेलियामा पढ्न आउने नेपाली विद्यार्थीलाई कालो पाइन्ट र जुत्ता लिएर आउनु रेस्टुरेन्टमा ‘किचन’मा अनि ‘क्लिनिङ’को क्षेत्रमा काम गर्दा काम लाग्छ भन्ने सुझाव दिने परिपाटी बदल्न सिड्नीका युवाहरू लागिरहेका छन्। उनीहरूले अस्ट्रेलियाको आइटीमा उपलब्ध अवसरहरू सम्म नेपाली विद्यार्थीलाई पुर्‍याउने र त्यस्ता अवसरबाट लाभ उठाउन सहयोग गर्नको लागि ‘आइटी हब’ समेत सञ्चालन गरेका छन्। 

अस्ट्रेलियामा सफ्टवेयरको क्षेत्रमा काम गर्ने मात्र होइन, नयाँ विद्यार्थी तथा यो क्षेत्रमा जागिर करिअर खोज्नेहरूलाई सहयोग गर्न ‘आइटी हब’ले करिअर सेमिनार र मिट अप गरिरहेको छ। आइटी हबका संयोजक मदनमणि अधिकारी भन्छन्, ‘हामीले अस्ट्रेलियाको सफ्टवेयर र आइटी उद्योगको माग अनुसारको सीप भएका नेपालीहरूलाई सीप अनुसारको जागिर पाउन सहयोग गर्न खोजेका हौँ।’ 

धेरै नेपाली विद्यार्थीहरू अस्ट्रेलियामा नेपाल वा अस्ट्रेलियामा पढेर हासिल गरेको डिग्री अनुसारको काम नपाएर श्रमिक तहको काम गर्नुपर्ने अवस्थामा छन् भन्ने गरिन्छ। अधिकारी भन्छन्, ‘त्यस खालको हल्ला धेरै भए पनि अवस्था परिवर्तन भइरहेको छ, अहिले धेरै विद्यार्थीहरूले प्रोग्रामिङ र सफ्टवेयरको क्षेत्रमा राम्रो उपलब्धि हासिल गरिरहेका छन्, सफ्टवेयर इन्जिनियरका रूपमा काम गरेर छोटो र छिटो प्रगति गरेका, जागिरको कारण नै अस्ट्रेलियामा पीआर पाएका धेरै जना मैले नै भेटेको छु। ठूला कम्पनीहरूको आइटी विभाग नै नेपालीले सम्हालेको उदाहरण धेरै छ।’ 

विश्वभर जसरी भारतीयहरू आइटीको क्षेत्रमा नेतृत्व दिने स्थितिमा छन्। नेपालीहरूले पनि सीप विकास गर्ने हो भने त्यो अवस्था नेपाली समाजको पनि हुनसक्छ भनेर सिड्नीमा नियमित ‘करिअर हब’ले ‘करिअर कार्यशाला’का रूपमा ‘मिट अप’ आयोजना गर्दै आएको छ,’ उनी भन्छन्। 

अस्ट्रेलियालाई ४२ हजार नयाँ सफ्टवेयर प्रोग्रामर चाहिने 
भविष्यमा अस्ट्रेलियामा सफ्टवेयर प्रोग्रामरको माग धेरै हुने यहाँको स्किल कमिसनले जनाएको छ। स्किल कमिसनका अनुसार आगामी चार वर्षमा अस्ट्रेलियालाई ४२ हजारभन्दा बढी सफ्टवेयर प्रोग्रामरको आवश्यकता पर्नेछ। 

अस्ट्रेलियालाई सन् २०२६ सम्ममा थप १२ लाख कामदारको आवश्यकता पर्ने बताइएको छ। स्किल कमिसनले अस्ट्रेलियाको रोजगारी, पेसा तथा विभिन्न उद्योगहरूको कामदार र सीप आवश्यकताको अध्ययन गरेर वर्तमान र भविष्यका सीप आवश्यकतासम्बन्धी सुझाव दिने गर्दछ। 

२०२१ नोभेम्बरमा अस्ट्रेलियामा एक लाख ५६ हजार दुई सय सफ्टवेयर इन्जिनियर तथा डेभलोपर प्रोग्रामर थिए । २०२६ नोभेम्बरमा त्यो संख्या एक लाख ९८ हजार चार सय हुने अनुमान छ। सफ्टवेयर इन्जिनियर तथा डेभेलोपर प्रोग्रामरका लागि रोजगारीको अवसरमा २७ प्रतिशतले वृद्धि हुने देखिन्छ।   

  • प्रकाशित मिति : साउन १६, २०७९ साेमबार १२:३७:२६,   अन्तिम अपडेट : साउन १६, २०७९ साेमबार १२:३९:५०

फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया