नर्भिक अस्पतालले बनाएको संरचना भत्काउने विषयमा जानकारी लिन मेयर बालेन्द्र साह आफैँ थापाथली पुगेका छन् ।
सोमबार काठमाडौं महानगरपालिकाले सम्झौताविपरीत नक्सा पास नगरी बनाएका संरचना हटाउनेबारे २४ घन्टे अल्टिमेटम दिएको थियो ।
यसबारे जानकारी लिन मंगलबार दिउँसो मेयर बालेन आफैँ नर्भिक अस्पताल पुगेका हुन् । उनले प्रहरी र महानगरका टोली लिएर नर्भिक पुगेका थिए । उनले त्यहाँ भवन निर्माणका अवस्था, नक्सा लगायतका विषयमा जानकारी लिएका थिए ।
यता अस्पतालले भने अक्सिजनलगायत अत्यावश्यक संरचना रहेको भन्दै हटाउन नसकिने बताएको छ । साथै नर्भिक अस्पतालका प्रतिनिधिले स्थायी संरचना बनेको भन्दै मेयर बालेन शाहलाई आस्वस्त पार्ने प्रयास गरेका थिए । उनीहरूले ट्रस स्टक्चर बनाएको र चाहेको खण्डमा अटाउन सकिने समेत बताएका थिए ।
यसअघि नर्भिक अस्पतालले पत्रकार सम्मेलन गरेर २० वर्षका लागि सम्झौता गरेकाले संरचना हटाउन नसकिने बताएको थियो ।
सोमबार महानगरले नर्भिक अस्पताललाई पत्र काट्दै सरकारसँग भएका सम्झौताविपरीत र नक्सापास स्वीकृत नगरी निर्माण भएको भन्दै हटाउन भनेको थियो ।
सहरी व्यवस्थापन विभागका प्रमुख सुरज शाक्यले नेपाल सरकारको नाममा दर्ता रहेको जग्गा हस्पिटलले भाडामा लिई क्यान्टिन भवनलगायत सम्झौताविपरीत र नक्सापास स्वीकृत नगरी निर्माण भएको पाइएकाले हटाउन भनिएको बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
