श्रीलंकामा जारी साफ यू–१७ च्याम्पियनसिपमा नेपालले आफ्नो पहिलो खेलमा आज भुटानको सामना गर्दैछ । कोलम्बोको रेस कोर्स ग्राउन्डमा समूह ‘बी’ अन्तर्गत हुने खेल नेपाली समयानुसार राति सवा ८ बजे सुरु हुनेछ ।
नेपाल आज जित निकाल्दै सुखद सुरुवातको योजनामा छ । भुटान पनि नेपाललाई हराएर पहिलो जित निकाल्न चाहन्छ । सोमबार भएको उद्घाटन खेलमा भुटान भारतसँग ३–० ले पराजित भएको थियो ।
साफ यू–१७ को नाममा पहिलोपटक आयोजना हुन लागेको यो प्रतियोगितालाई यसअघि यू–१६ र १५ को नामबाट सञ्चालन गरिएको थियो । पहिलोपटक सन् २०११ मा साफ यू–१६ च्याम्पियनसिपका रूपमा आयोजना भएको यो प्रतियोगिताको पछिल्लो संस्करण २०१९ मा यू–१५ उमेर समूहमा आयोजना गरिएको थियो ।
यसअघि यू–१६ र १५ उमेर समूहमा यी दुई टोलीले दुई खेलमा एकअर्काको सामना गरेका थिए । जसमा दुवै खेल नेपालले जितेको छ । सन् २०१३ को साफ यू-१६ साफ च्याम्पियनसिपअन्तर्गत भएको पहिलो भेटमा नेपालले ७–० को जित निकाल्यो ।
२०१९ को साफ यू–१५ साफ च्याम्पियनसिपअन्तर्गतको पछिल्लो भेटमा नेपाल ६–० ले विजयी भएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
